DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interrogatoriu, deside aplika medida Aprezentasaun Periodika (AP) ba sidadaun estranjeiru nain 3 ho inisial ZOT, YE no Z, tanba deskonfia komete krimi rua.
“Aprezentasaun kada fulan ida dala ida, no aplika mos kausaun ka jaminan US$ 21.500,” dehan Advogadu Marinho da Cruz ba jornalista STL iha Kaikoli, Dili, Sesta nee.
Nia hatutan, sira nia kliente ho inisial JOT, sidadaun Indonezia, sira aseita ho despaisu nee tanba nee la halo rekursu.
Tanba iha prosesu primeiru interogatoriu nee Ministeriu Publiku aprezenta mai hodi husu Tribunal atu avalia provas inisial sira neebe iha, hodi asegura prosesu investigasaun neebe sei lao.
Nunee iha alegasaun Ministrriu Publiku (MP) nian husu Tribunal atu aplika medida neebe aas, medida proivisaun de auzensia tanba konsidera ema sira nee sidadadaun estranjeiru hodi prende sira nia passaporte, no MP husu atu aplika prestasaun kausaun ba Xina nain rua kada ema ida rihun US$ 10, ba sidadaun Indonezia husu atu aplika medida prestasaun kausaun rihun US$ 25.
Defeza nee mos husu atu Tribunal haree didiak verifika hodi hili medida koasaun neebe adekuadu, hodi asegura prosesu investigasaun neebe sei lao hela.
Maibe Defeza la konkorda ho kausaun nee, tanba nesesidade investigasaun kopera, ho ida nee husu atu mantein ho medida Termo Indentidade Rezidensia (TIR).
Entretantu Prosesu primeiru interogatoriu nee, prezide husi Juiza Ersilia de Jesus, Ministeriu publiku reprezenta husi Prokurador Matias Soares, arguidu hetan asistensia husi Advogadu Privadu nain tolu.
Jornalista: Terezinha De Deus
Editora: Carme Ximenes
