AMBENO, STLTIMORLESTE.com – Arguidu nain 5 no arguida nain 1 neebe deskonfia pratika jogu online ilegal ba esplorasaun jogu ilisitu kriminoza no burla informatika, redi Scam Call Center transnasional neebe instala iha otel Oe-Upun, hafoin primeiru Interogatoriu, Tribunal Judisiariu Primeira Instansia Distribu Oekusi iha loron Sesta loraik (29/08/2025) hetan prizaun preventiva no daudaun suspeitu sira nee kontinua detein iha sela detensaun sela Komando Polisia Nasional Timor Leste (PNTL) Rejiaun Administrativa Espesial Oekusi-Ambeno (RAEOA).
Tuir Advogadu Privadu ba suspeitu nain 6 ba pratika Jogu Online ho Burla Informatika Redi Scam Call Center, Octavio Cardoso dehan, desizaun husi TJPI Distrital Oecusse, iha indisius no ninia kliente nain 6 nee, hetan prizaun preventiva.
“Prosesu primeiru interogatoriu neebe mak ita boot sira akompanhia iha Tribunal Judisiariu Primeira Instansia Distritu Oecusse, ohin loron hetan ona rezultadu liu husi despaixu tribunal nian ho faktus oi-oin neebe maka tribunal konsidera, ida nee hanesan mandatoriu ida ba iha prosesu ida nee, aplika koasaun prevensaun prizaun ba arguidu nain 6 nee, no prizaun preventive ida nee nia durasaun depende ba iha prosesu akuzasaun neebe maka mai iha tribunal, karik iha prizaun nia laran maka iha akuzasaun neebe mak mai, mak sei halo medida koasaun ba ida nee, alendisu hau mos iha dever atu halo rekursu ba iha prosesu ida nee, hau atu koalia deit katak, iha loron 5 nia laran, hau sei hatama rekursu,” dehan Octavio.
Nia dehan, akuzasaun ba ninia kliente kona-ba krimi burla agravadu nomos burla informatika atividades jogu ilisitu.
Tuir Defensor Publiku, Estaqui Guterres katak, husi rezultadu primeiru interogatoriu nee, nia ho Advogadu privadu nain rua sei hatama rekursu ba sira nia kliente hamutuk nain 6, arguidu nian 5 no arguida nain ida tama privasaun preventiva, ida nee desizaun husi tribunal neebe maka diak liu tuir akuzasaun neebe prizaun akuza.
“Hau hakarak atu hatoo deit katak, primeiru interogatoriu nee partisipa husi advogado nain rua no husi defensoria publiku hau rasik, neebe primeiru interogatoriu nee halo iha Tribunal Judisiariu Primeiru Instansia (TJPI), durante loron rua nia laran, ikus mai Tribunal Distrital Rejiaun Administrativa Espesial Oecusse Ambeno (RAEOA) fo despaixu ninian haree ba tribunal ninia hanoin katak, prizaun preventiva maka adekuadu ba arguidu nain 6, mezmu iha loron horiseik defeza hatoo nia alegasaun nee normal hotu, maibe tribunal nia hanoin, diferente ho advogadu nia hanoin, defeza nia hanoin, Ministeriu Publiku nia hanoin, ida nee kestaun ida neebe normal, buat neebe lao iha sistema justisa maka sempre hanesan nee, maibe defeza ho advogadu ohin konkorda malu ona, para depois halo rekursu ba iha desizaun ida nee, tanba nee ninia prazu prizaun preventiva nee loron 30, bele mos la too. Ami hatoo rekursu kona ba fundamenta kona ba saida maka tribunal fundamenta,” dehan Defensor Publiku, Estaqui Guterres.
Kazu nee rejista iha Ministeriu Publiku, Prokuradoria Republika Primeira Instansia de Oecusse, ho Nuc 0035/25.PDOEC, Tribunal Desizaun prizaun preventive, lidera husi husi Juis Administrador Judisiariu Primeira Instansia Oecusse, Evangelino Belo, Ministeriu Publiku reprezenta husi Prokurador Mateus Nessi ho Jose Elo no suspeitu nain 6 nee servisu iha kompanhia Seagull Resort husi Malazia neebe halao atividade jogu Online no Redi Scam Call Center Transnasional neebe instala iha Otel Oeupu RAEOA, hetan asistensia legal husi defeza Advogadu Privadu Octavio Cardoso ho Jhon Ndun, nunee Defensor Publiku Estaqui Guterres.
Jornalista: Joseph Koa
Editor: Joseph Koa
