BAUKAU, STLTIMORLESTE.com – Komponente Forsa Terestre (CFT – sigla português) Lanud Baukau lansa ezersisiu Matebian 25.2 durante semana rua iha parte Leste.
Xefe Estadu Maior F-FDTL Brigadeiru Jeneral José da Costa “Trix” informa, loron 01 Setembru 2025 Institusaun FALINTIL-FDTL husi Komponente Forsa Terrestre lansa ezersisiu Matebian sei termina iha loron 14 Setembru 2024. Ezersisiu refere realiza iha Postu Administrativu Kelikai, Munisipiu Baukau no Aldeia Laikai-wa, Suku Makadiki, Postu Uatulari, Munisipiu Vikeke.
“Nee ezersisiu pratiku ida iha kedas terenu para bele foti buat neebe aprende no pratika tuir realidade Timor ninian,” hateten Trix liu husi diskursu iha serimonia abertura Ezersisiu Matebian neebe realiza iha CFT Lanud Baukau, Segunda (01/09/2025).
Nia sublina, objetivu husi ezersisiu refere atu hasae kapasidade militares sira nian iha nivel planeamentu, tekniku, inklui nivel tatiku nian neebe sei halao atividade Sivil Militar iha populasaun nia leet.
Nia fundamenta, pratika importante neebe militares sira atu halo iha terenu mak tatika ofensiva no defensiva nian hodi antisipa ba situasaun ruma akontese, tanba hatene Timor iha forsa kiik, maibe liu husi ezersisiu refere bele aumenta kapasidade militares sira nian iha terenu kona-ba oinsa monta defensiva iha Postu Komando ida no entermus tatikus operasionais neebe bele lansa atake inimigu iha iha terenu.
“Ezersisiu neebe Komando Komponente Terrestre planeia semana rua. Iha semana rua nia laran tuir pratika neebe ita hatene sei hetan difikuldades barak. Dala ruma loron rua la han, dala ruma kalan la tein, iha parte defensiva abrigu iha neeba dala ruma loron tolu toba deit iha abrigu laran la sai,” Trix akresenta.
Xefe Estadu Maior F-FDTL, Brigadeiru Jeneral José da Costa “Trix” deklara, Ezersisiu Matebian kona-ba militares sira sei la han, la tein no la sai husi abrigu atu komunga espiritu sobre vivente nian no espiritu sakrifisiu nian tuir irarkia Komando iha fatin Ezersisiu Matebian.
Entretantu serimonia nee hetan partisipasaun husi estrutura Autoridade Munisipiu Baukau, Komando Polisia Munisipiu Baukau, Konselhu Kombatentes Baukau, Klinika David Alex Daitula no Hospital Rejional Eduardo Ximenes.
Jornalista: Tomas Reis
Editor: Xisto Mendonaca
