BAUKAU, STLTIMORLESTE.com – Komando Polisia Munisipiu Baukau liu husi Servisu Investigasaun Kriminal aprezenta ona kazu subrinhu oho tiu ba Ministeriu Publiku (MP).
Komandante Komando Polisia Munisipiu Baukau, Superintendente João Sancho Pires esplika, kazu omesidu refere akontese iha loron 30 Agostu tinan nee pur-volta tuku 09:00 dader, involve husi ema nain 3 mak hanesan suspeitu nain 2 inisial JP, RP no vitima nain 1 Sebastião Belo neebe hetan sona rezulta mate, maibe antes asaun sona akontese suspeitu no vitima sira nain 3 halo uluk ona agresaun fiziku ba malu hafoin akontese sona malu, iha neebe esforsu familia sira transporta JP no Sebastião Belo ba Hospital Rejional Eduardo Ximenes (HoREX) Baukau hodi halo tratamentu, maibe Sebastião Belo la konsege sala, tanba hetan sona iha hirus matan enkuantu JP hanesan matebian nia subrinhu rasik dadaun baixa hela, tanba kondisaun kanek grave iha parte kabun.
“Informasaun neebe ita tama hela katak, subrinhu sona hela Tiu, Tiu mos dehan sona subrinhu, maibe orsida ita haree nia prosesu investigasaun mak ita haree klean liu, ita haree ho matan ida seluk nee mos kanek, maibe nia motivu too prosesu investigasaun lao hela ita mos foti sasin neebe mak iha hela fatin atu nunee ita presta ba Ministeriu Publiku haree asuntu nee,” hateten João Sancho Pires ba jornalista sira iha nia knaar fatin Vila Nova Baukau, Segunda (01/09/2025).
Nia sublina, informasaun neebe espalha katak, Sebastião Belo mate tanba hetan sona husi subrinhu JP no subrinhu JP rasik mos hetan kanek grave iha parte kabun, tanba nee Komando Polisia aprezenta ona kazu refere ba Ministeriu Publiku ho evidentemente tudik modo nian 2, tudik sankur 1 no diman 1 haree kazu refere.
Nia fundamenta, kronolojia ba kazu omesidu refere, tanba kestaun rai. No kazu refere ba Ministeriu Publiku ho sasin nain 2.
“Faze investigasaun lao tiha ona, tanba ita rejistu tiha ona numeru nuc.067 iha Ministeriu Publiku hein bolu hodi halo julgamentu,” João akresenta.
Kazu omesidu refere involve ema nain 3 hanesan tiu mate no subrinhu nain 2 seluk nain 1 dadaun halo tratamentu enkuantu nain 1 subrinhu RP asegura ona iha sela Komando Polisia Baukau hodi hein prosesu.
“Ida seluk neebe nia alin agora dadaun ita tau hela iha sela Baukau, aproveita dia seguente ita rejistu ona kazu nee ba Ministeriu Publiku atu haree prosesu lao ba oin,” nia tenik.
Kazu omesidu nee akontese iha area Planaltu Vila Nova, Aldeia Lutumutu, Suku Tirilolo, Postu Baukau Vila.
Matebian Sebastião Belo husi Suku Lacoliu, Postu Kelikai, Munisipiu Baukau no JP no RP nuudar matebian nia subrinhu rasik husi Postu Laga Munisipiu Baukau.
Entretantu mate isin Sebastião Belo hanesan tiu husi subrinhu dadaun iha Hospital Nasional Guido Valadares Dili.
Jornalista: Tomas Reis
Editora: Domingas Gomes
