DILI, STLTIMORLESTE.com – Jurista Timoroan konsidera katak, bele halo revizaun ba Konstituisaun Republika Demokratika Timor Leste (K-RDTL), maibe tenke iha konsensus politiku husi partidu politiku neebe hetan asentu iha Parlamentu Nasional (PN) ho votus maioria.
Liafuan nee haktuir husi Jurista Sergio Dias Quintas, ba jornalista STL iha Kaikoli, Segunda (01/09/2025).
“Hau hanoin nee diak se karik halo revizaun kuandu iha ona konsensus politiku iha PN halo deit revizaun, tanba iha konstituisaun nee artigu balu maka la relevante ona ho situasaun aktual, no nee diak ba dinamika Estadu Timor Leste nia moris,” dehan nia.
Tuir Sergio, nia hare artigu balu iha konstituisaun nian, ezemplu hanesan krime grave la presija ona no artigu balu konaba justisa nian, inklui artigu balu, tanba nee iha publiku balu soe nia opiniaun dehan atu halo revizaun ba iha konstituisaun ida nee relevante tebes.
Nia katak, norma konstituisaun nee norma ida neebe boot liu iha rai ida nee, tanba nee tenke suporta husi bankada neebe hetan asentu no tur iha PN.
Tanba nee husu ba iha Partidu Politiku sira neebe hetan asentu iha PN, atu halo revizaun ba norma konstituisional, tanba iha artigu lubuk ida maka la relevante ona ho realidade Timor nian, tanba nee presiza halo revizaun.
Iha fatin ketak Jurista Alexandre Corte Real dehan, bele halo amandamen ba konstituisaun, tanba konstituisaun tama iha vigor dehan tinan 6 bele halo, maibe liu tiha ona.
“Agora defende sira husi Bankada sira nee tur hamutuk tanba buat nee laos fasil prense korum, sira sei diskuti saida maka sira sei halo amandamen, “dehan Alexandre.
Nia hatutan, se hakarak halao amandamen partidu sira tenke hanoin hanesan, no partidu balu neebe kestiona nee tur hamutuk hodi konkorda vota, tanba minimu nee maioria 46 votu, tanba nee bankada sira tenke tur hamutuk. Tanba nee tenke votu maioria liu liu FRETILIN no CNRT.
Aleinde nee Prezidente Tribunal Rekursu, Afonso Carmona katak, fila fali ba iha votasaun husi Partidu Politiku sira, partidu sira la hamutuk oinsa maka bele hetan maioria hodi halo amandamen. Maibe konsidera nesessariu hodi halo amandamen ba konstituisaun.
Jornalista: Terezinha De Deus
Editora: Domingas Gomes
