BAUKAU, STLTIMORLESTE.com – Asaun tuda rahun kareta no sunu kareta estadu ida iha ambitu manifestasaun hasoru Parlamentu Nasional, deskonfia envolve husi pesoal terseira parte neebe hakarak estraga manifestante sira nia luta.
Tuir Padre Parokia Santo Antonio Baukau, Manuel da Silva Ximenes, SDB katak, kona-ba asaun manifestasaun hasoru Parlamentu Nasional, tanba Timor-Leste Nasaun Demokratiku nunee sidadaun hotu-hotu iha direitu liberdade atu expresa sai buat neebe sente hodi hakilar liu husi manifestasaun sira nee buat normal, maibe husu asaun hotu tenke ho sienseridade no responsabilidade hanesan sidadaun onestu hodi la kontra fiar kriataun nian, maibe kona-ba sunu karreta Estadu no harahun kareta husi Polisia Nasional Timor Leste, deskonfia asaun husi ema terseira parte.
“Horiseik kuandu akontese ida nee hau mos deskonfia oituan, dala ruma ema manifestante sira nee iha intensaun diak atu expresa sentimentu, bele mos iha pihak ketiga ruma bele halo lasu buat sira nee ba sira, neebe hau labele fo sala ba sira, tanba dala ruma ema la gosta ita nia manifestante sira bele uza estraga ita nia manifestante sira, maibe se sira mak halo nee lanele, tanba patrimoniu Estadu nee ita nian,” hateten Pe. Manuel ba STL iha Vila Antiga, Buakau, Kuarta (17/09/2025).
Padre Parokia Santo Antonio Baukau nee sublina, asaun manifestasaun refere presiza fo seguransa diak, tanba pesoal terseira parte bele aproveita situasaun hodi estraga esforsu sira neebe manifestante sira halo hasoru Parlamentu Nasional.
Maibe bainhira asaun tuda no sunu karreta pratika direita husi manifestante sira nee labele, tanba sasan neebe hetan estragus no sunu sasan Estadu neebe sosa husi Orsamentu Povu nian nunee manifestasaun bele lao, maibe kuidadu mos fasilidade publiku sira.
“Neebe hau la fo sala buat sira hanesan nee sempre mosu pihak ida nee ida neeba, hau deskonfia buat sira nee sempre mosu buat ruma iha laran, se sira mak halo hau nia apelu ba sira labele estraga fali sasan estadu nian, tanba sasan estadu nian ita gasta povu nia osan,” Pe Manuel fundamenta.
Padre Parokia Santo Antonio Baukau nee argumentu, presiza seguransa esforsu masimu atu ema seluk mosu iha area manifestasaun hodi disturbiu, tanba mundu ohin loron ema balun hakarak halo diak no balu hakarak instabilidade.
Jornalista: Tomas Reis
Editora: Carme Ximenes
