DÍLI, STLTIMORLESTE.com – Estudante sira hetan enkorajamentu atu luta maka’as ba estudu, evita violénsia no aproveita oportunidade edukasaun hodi prepara futuru ne’ebé di’ak.
Mensajen ne’e hato’o husi sobrevivente Masakre Santa Cruz 1991, Josefina Maia, durante Semináriu Nasionál ho tema “35 anos Masakre Santa Cruz, Reorientasaun Papel Juventude no Restaurasaun Valor Identidade Nasionál”, iha Salaun UNDIL, Tersa (10/11/2026).
Iha nia intervensaun, Josefina Maia husu estudante sira atu fó prioridade ba edukasaun no dedika an tomak ba estudu, tanba oportunidade ne’ebé sira hetan agora importante tebes ba sira-nia futuru.
“Hau nia lia-menon mak estuda. Husu estudante sira luta ba estudu. Se bele, imi lao ho kadernu, toba ho kadernu no hader ho kadernu,” dehan Josefina Maia.
Nia mós haforsa estudante sira atu evita hahalok violénsia no la uza fatuk, tanba futuru nasaun nian sei iha liman juventude sira. Nia hakarak juventude sai jerasaun ne’ebé kontribui ba dame no dezenvolvimentu, la’ós kontinua hahalok ne’ebé bele estraga futuru.
Josefina esplika katak, iha tempu uluk, nia no jerasaun nia kolega sira la hetan oportunidade atu estuda ho di’ak, maski iha vontade atu kontinua edukasaun, tanba situasaun iha tempu ne’ebá la permite.
Nia mós fahe esperiénsia pesoál bainhira partisipa iha manifestasaun, ne’ebé rezulta hasai nia hosi eskola.
Maski hasoru obstákulu ne’e, nia kontinua iha determinasaun atu realiza mehi akademiku.
Nia konta katak, iha tempu ne’ebá, nia hateten ba ema sira ne’ebé hasai nia hosi eskola katak, maski sira bele hasai nia hosi eskola, maibé loron ida bainhira Timor-Leste ukun an, nia sei hetan títulu lisensiatura.
Nia konsege realiza mehi ne’e no gradua iha tinan 2016. Nia subliña katak, títulu akademiku ne’e la mai ho dalan fasil, maibé liuhusi esforsu, sakrifísiu no dedikasaun atu kontinua estuda.
Iha rohan, nia husu estudante sira atu valoriza oportunidade edukasaun ne’ebé iha agora, luta maka’as ba estudu no evita violénsia, hodi sai sidadaun ne’ebé bele kontribui ba dezenvolvimentu Timor-Leste.
(joa)
