DÍLI, STLTIMORLESTE.com – Prezidente Tribunál Rekursu, Afonso Carmona hateten, seidauk simu notifikasaun ofisiál kona-ba suspensaun transferénsia juíza na’in haat.
Deklarasaun ne’e nia hato’o ba jornalista sira iha Tribunál Judisiál Primeira Instánsia Díli, Kuarta (11/11), bainhira jornalista husu kona-ba desizaun Tribunál Rekursu.
“Seidauk simu notifikasaun, labele ko’alia katak hau hatene ona. Bainhira simu no lee mak foin hatene”, Afonso Carmona deklara.
Afonso Carmona, ne’ebé mós Prezidente Konsellu Superiór Magistratura Judisiál (KSMJ) insiste katak, nia seidauk bele hato’o pozisaun antes simu no lee dokumentu ofisiál.
Tuir informasaun JU,S Jurídiku Sosiál divulga, Tribunál Rekursu suspende ezekusaun desizaun KSMJ, iha prosesu n.º 101/INS.SUPEN/2026/TR.
Desizaun ne’e suspende transferénsia juíza na’in haat husi Tribunál Judisiál Primeira Instánsia Díli ba Suai, Oe-Cusse Ambeno no Baucau.
Ho suspensaun ne’e, juíza na’in haat sei kontinua hala’o knaar iha Díli to’o Tribunál Rekursu foti desizaun finál kona-ba legalidade transferénsia.
Juíza sira ne’e mak António José Fonseca Monteiro de Jesus, José Gonçalves, Ana Paula Fonseca Monteiro de Jesus no Francisca Marques Cabral.
CSMJ, iha 21 Agostu 2026, aprova transferénsia juíza na’in sia entre tribunál sira iha Díli, Baucau, Suai no Oe-Cusse Ambeno.
Juíza na’in haat ne’e kontesta transferénsia, tanba konsidera prosesu tenke kumpre rekizitu konstitusionál no legál, inklui garantia independénsia judisiál.
JU,S Jurídiku Sosiál argumenta katak, transferénsia ne’e bele viola prinsípiu inamovibilidade juízes nian, ne’ebé Konstituisaun no Estatutu Magistradu Judisiál proteje.
Tuir entidade ne’e, fundamentasaun CSMJ kona-ba nesesidade servisu bele la sufisiente atu justifika transferénsia juíza na’in haat.
Tribunál Rekursu konsidera mós katak, ezekusaun transferénsia antes desizaun finál bele prejudika continuidade prosesu judisiál no difikulta restaurasaun situasaun anteriór.
Iha Tribunál Díli, prosesu pendente hamutuk 746, inklui kazu kriminál 592, tuir dadus JU,S Jurídiku Sosiál divulga.
Suspensaun ne’e seidauk signifika katak Tribunál Rekursu deklara transferénsia CSMJ ilegál, maibé natureza provizória atu mantein situasaun ezistente.
JU,S Jurídiku Sosiál afirma katak, prosesu prinsipál sei kontinua, no Tribunál Rekursu sei deside legalidade deliberasaun CSMJ tuir prazu Estatutu Magistradu Judisiál determina.
Entidade ne’e konsidera suspensaun hanesan garantia ba independénsia judisiál no protesaun ba sidadaun sira ne’ebé buka justisa.
Maski nune’e, Afonso Carmona reafirma katak, nia seidauk bele hato’o pozisaun ofisiál kona-ba desizaun ne’e antes simu notifikasaun.
(ter)
