DILI, STLTIMORLESTE.com – Estudantes husi Ensinu Baziku Filial (EBF) Batara, Munisipiu Manatuto, nain 4 no ida seluk tuir nia maun ba eskola refere, horiseik hafoin konsumu manu tolun iha merenda eskolar, fila uma halo estudantes sira muta no lori ba baixa iha Sentru Saude Laklubar.
Diretor Servisu Edukasaun Munisipiu Manatuto, Patricio da Cruz Quintao hatete, horiseik estudantes sira nee han manu tolun iha merenda, no bainhira sira fila uma mak muta, no lori kedas sira ba iha sentru saude Laklubar. Lo-loos nee nain 4, tanba ida seluk eskola iha fatin seluk, maibe tanba nia tuir ninia maun ba iha eskola nee. Bainhira nia maun han merenda, fo manu tolun nee ba ninia alin han, entaun nain lima nee mak horseik lori ba sentru saude hodi baixa. Husi sira nain 5 nee balun horseik kedas rekopera, balun hori kalan, no balun ohin dader rekopera fila ona uma. Ohin balun hahu partisipa aprendizajen no balun sei iha uma.
“Hau foin kontaktu ho inspektor iha nee ba atu informa hela katak, los duni kazu nee akontese horseik. Total estudantes EBF Batara nee hamutuk 262, estudantes sira nee han hotu,agora afeita nee iha estudantes nain 4, labarik ida kiik nee tuir nia maun, entaun bainhira nia maun han merenda nee, fo tan manu tolun ba ninia alin mos moras hotu. Husi EBF Batara lolos nee nain haat, no ida seluk eskola iha fatin seluk mak lao tuir nia maun ba iha eskola nee,” dehan Patricio ba STL liu husi telefone, Kinta (18/09/2025).
Nia hatutan, husi nain 5 nee, feto 2 mane 3. Sira seluk nee tuir informasaun estudantes seluk nee diak hela, agora dadaun infermeiru no doutor sira haree hela manu tolun, neebe horseik estudantes sira konsumu, tanba manu tolun nee sei iha fuan rua iha neeba, tanba manu tolun nee sira sosa tutan husi kareta.
Nia hatutan, sira nia menu horiseik nee mak manu tolun ho mostarda.
Jornalista: Jacinta Sequeira
Editora: Domingas Gomes
