DILI, STLTIMORLESTE.com – Prezidente Republika (PR), Jose Ramos Horta marka aniversariu Balibo five ho serie entervista ho media Australia nia.
Iha loron Segunda (20/10/29025) Prezidente Republika, Jose Ramos Horta halao ajenda importante ida ho media iha Melbourne, hodi marka aniversariu da-50 ba assassinato jornalista sira neebe konesidu ho naran “Balibo Five”.
Iha serie entrevista ho destake boot iha Channel 7 no Channel 9, laureadu ho Premiu Nobel ba Pas nee uza okaziaun solene nee hodi refleta kona-ba lasu istoriku neebe klean entre Timor-Leste no Australia, hodi trasa mos dalan ba kooperasaun iha futuru. Prezidente mos hetan entrevista husi ABC Radiu no Australian Financial Review.
Tema sentral ida iha diskusaun sira-nee mak legadu duradouru hosi Balibo Five no esforsu kontinuu hodi buka justisa ba sira-nia família, iha-neebe Prezidente Ramos-Horta sublina dezeju boot ba responsabilizasaun no nesesidade atu parte Governu Australia nian husu deskulpa formal ida.
Xefe Estadu destaka oinsa trajedia nee mobiliza apoiu internasional ba luta Timor-Leste nian ba independensia no harii lasu solidariedade neebe metin ho povu australianu. Relasaun istoriku ida-nee, Prezidente hateten, agora sai nuudar baze ba parseria estratejika moderna iha area edukasaun, saude no iha resposta konjunta ba dezafiu global hanesan alterasaun klimatika.
Aleinde reflesaun istorika, Prezidente Ramos-Horta aprezenta mos ninia vizaun ekonomiku ba futuru Timor-Leste nian.
Iha entrevista, Prezidente destaka planu sira atu dada investimentu estranjeiru liuhusi promosaun estabilidade polítika no dezenvolvimentu iha setor xave sira hanesan enerjia renovavel, turizmu no agrikultura sustentavel.
Hodi sublina importansia estratejika projetu gas Greater Sunrise nian, Prezidente deskreve imajen nasaun ida nian neebe prontu ba kreximentu no ba integrasaun tomak iha ekonomia rejional ASEAN nian, hodi balansa komemorasaun ba ninia pasadu ho planu ambisiozu sira ba ninia futuru.
Jornalista: Emerenciana Pinto
Editora: Carme Ximenes
