DILI, STLTIMORLESTE.com – Prezidente Republika (PR), Jose Ramos Horta finaliza ona ninia orsamentu ho montante milhaun US$12.172 ba tinan 2026.
Prezidensia Republika Timor-Leste nian finaliza ona ninia orsamentu ba tinan 2026 ho montante milhaun US$ 12.172, hafoin asegura aumenta neebe importante husi finansiamentu.
Iha biban nee Xefe Kaza Sivíl Prezidensia, Jesuína Maria Ferreira Gomes, Liu husi Komunikadu neebe STL asesu husi media Prezidensia Republika Segunda kalan 20/10/2025 konfirma valor nee hafoin audiensia ho Komisaun A Parlamentu Nasional nian.
Durante enkontru, Jesuína Gomes informa mos katak, too fulan-outubru 2025, porsentu 76 husi orsamentu tinan-ida-nee nian ho valor milhaun US$ 10.8, ezekuta ona, ho saldu restu milhaun US$ 2.6 ba restu tinan nee nian.
Orsamentu 2026 reprezenta aumentu signifikativu husi proposta inisial milhaun US$ 8, konsidera la sufisiente atu kobre ninia operasaun sira neebe planeia ona.
Millaun US$ 4.1 adisional hetan aprovasaun atu finansia programa hitu, sub-programa sanulu-resin-rua, no atividade tolunulu-resin-sia iha area xave sira hanesan salariu, bens no servisu, transferensia publika, no kapital menor. Ida-nee garante katak instituisaun hetan fundus adekuadu hodi kumpre ninia dever sira iha tinan fiskal oinmai.
Xefe Kaza Sivíl klarifika katak fundus adisional sira hetan pedidu no aprovasaun husi Komisaun Revizaun Orsamental governu nian, laos husi Parlamentu.
Nia Afirma katak, montante neebe aprova ona, agora konsidera sufisiente atu finansia programa hotu-hotu Prezidensia nian ba tinan 2026, no hanesan rezultadu, sei la submete pedidu orsamental foun ba Parlamentu Nasional.
Jornalista: Emerenciana Pinto
Editora: Carme Ximenes
