ERMERA, STLTIMORLESTE.com – Prezidente Republika (PR), Jose Ramos Horta hatete, oras nee animal barak hahu menus ona, tanba nee husu komunidade labele oho animal arbiru no hadomi natureza Timor nian.
“Problema boot iha Timor Leste animal lubuk ida laiha ona no laku mos laiha ona, laku nee importante tebes, laos deit ba ita nia kafee, tanba kafee laku ten nee folin boot tebes iha hongkon kilo ida bele too dolar atus lima sein grama deit bele too dolar atus lima, se ita bele haree oinsa aumenta produsaun kafee laku ten nee osan boot bele fila ba komunidade sira no sira neebe, maibe labele oho no kaer han nia tan, animal barak laiha ona Timor mohu dadaun ona hanesan Manu lakateu, Kakoa, kakatua, kadavez menus, makikit ita haree menus hau halo kampanha tanba nee mak hau halo jardim ida iha palasiu para hahu eduka no halo kampanha iha televizaun,” dehan Prezidente Republika, Jose Ramos Horta ba jornalista sira, iha Gleno, Kuarta (22/10/20250).
Iha biban nee Prezidente Republika hatete, nia mos koalia ona ho Governu balun sira atu ajuda restaura fali kakatua iha Timor atu haree problema kakoak.
“Agora ita laharee kakoak nein ida, tinan 20 resin ona hau seidauk haree kakoak ida, ate kuda Timor mos hahu menus, tanba ema han tiha nemos hau hakarak restaura fali tanba nee mak kuda rua ka tolu iha jardim palasiu inkluidu kuda kiik rua, kiik rua nee laos Timor nia, nunee bele intrus nunee tinan ruma bele iha ona atus ba atus rihun ba rihun, labarik sira gosta los ida nee,” dehan Horta.
Xefe Estadu hatete, iha Eropa uza kuda badak kiik nee iha jardim sira, nunee labarik sira uza hodi halimar.
Tanba nee tenke buka hadomi animal manufuik sira, kiik oan sira labele oho animal, labele anti meda, labele han tiha fali laku no labele oho makikik manu sira. Maibe hakiak nuene hodi hatudu ba aan rasik katak hadomi ai laran hadomi ai, bee matan sira hadomi tasi, mota no hadomi animal hotu.
Jornalista: Emerenciana Pinto
Editora: Carme Ximenes
