DILI, STLTIMORLESTE.com – Governu sei halo reuniaun interministerial hodi rezolve rai, nunee investor husi Japaun bele harii estaleiru naval ida iha Timor Leste (TL).
Lia hirak nee hatoo husi Ministru Planeamentu no Investimentu Estratejiku, (MPIE), Gastão Sousa ba jornalista sira, bainhira remata halo enkontru ho Prezidente Republika Jose Ramos Horta, iha Palasiu Prezidensial Nicolau Lobato, Bairo Pite, Kuarta lokraik (22/10/2025).
Nia hatete, Governu sei halo reuniuan hodi bele rezolve rai, nunee harii estaleiru iha Timor Leste.
Iha hasoru malu nee Prezidente Republika, Jose Ramos Horta husu servisu infraestrutura lao diak hotu, ministru dehan ezekusaun fundu infraestrutura mak foin atinji 33%. Maibe iha mos pagamentu balun neebe seidauk prosesa, no durante fulan ida ka rua mai nee esforsu oinsa bele aselera ezekusaun nee ba oin.
“Husu mos katak, haree mos investimentu husi Japaun neebe atu estabelese estaleiru nee. Hau esplika ona ba Prezidente Republika katak, ami sei reuniaun interministerial ida nunee rezolve rai neebe kompanhia presiza atu Governu atribui, nunee sira bele estabelese nia estaleiru iha neeba,” dehan Ministru.
Ministru dehan, Ministeriu Justisa foin atribui 90 hektares maibe kompanhia presiza 600 hektares, kompanhia mai hasoru Ministru, “hau mos hetan despaisu husi Primeiru Ministru nunee hamutuk ho MOP, MJ haree asuntu ida nee,” dehan Ministru.
Ministru hatutan, espera semana oin ministru bele organiza interministerial, nunee bele rezolve tiha asuntu ida nee.
Foin lalais nee delegasaun empreza internasional Tsuneishi Shipbuilding, Co.Ltd husi Japaun hasoru malu ho Primeiru Ministru (PM), Xanana Gusmão, hodi hatoo sira nia prontidaun atu harii estaleiru naval ida iha Timor Leste.
Delegasaun emprezariu internasional husi empreza Tsuneishi Shipbuilding Com.Ltd hasoru malu ho PM Xanana akompanha husi Embaixador Japaun nian mai Timor Leste, Tetsuya Kimura.
Fatin sira neebe kompanhia nee identifika mak hanesan iha area tasi ibun Munisípiu Manatuto, iha mos Postu Administrativu Laleia nian. Maibe, ida nee mos husi tekniku sira kompanhia nee nian sei ba halo lai estudu viabilidade, hafoin hahu nia implementasaun.
Jornalista: Emerenciana Pinto
Editor: Xisto Mendonça
