DILI, STLTIMORLESTE.com – Primeiru Ministru (PM), Kay Rala Xanana Gusmão ho Prezidente Republika, Jose Ramos Horta iha loron Sesta sei ba Malazia, hodi partisipa selebraun Timor Leste nia adezaun ba ASEAN, neebe sei selebra iha loron 26 fulan Outubru tinan nee.
Kestaun nee hatoo husi, Primeiru Ministru Kay Rala Xanana Gusmao ba jornalista sira, bainhira remata halao enkontru semanal ho Prezidente Republika, Jose Ramos Horta, iha Palasiu Prezidensial Nicolau Lobato, Bairo Pite, Dili, Kinta (23/10/2025).
“Dehan mos ba Prezidente Republika katak aban atan oan hau sai ba pasiar lokraik Prezidente Republika mos sai tuir hau atu ba pasiar, neebe atu dehan ba ita boot sira katak, iha loron 4 ka 5 iha Malazia iha loron 26 Outubru ita sei sai membru plenu ASEAN nian, hau informa ba Prezidente Republika buat hotu hotu neebe ita atu kumpre antes ita tama ita kumpre hotu ona, tantu husi Parlamentu Nasional husi Governu ita kumpre hotu ona no sira mos, admira tanba loloos nee iha tempu ida badak tebes nee mais ita esforsu,” dehan PM, Xanana.
Xefe Governu hatutan, sei lembra katak dala rua ka dala tolu iha Ministeriu Negosiu Estranjeiru no Kooperasaun bolu Ministru hotu, hodi fahe serbisu para bele ajuda malu, tanba nee kriteria tama ASEAN kompleta hotu ona.
“26 iha Dili mak sei iha festa oan ida selebrasaun ida iha sentru Lecidere, hau mos koalia ho Prezidente Republika no Prezidente Republika mos husu bainhira loos mak orsamentu, hau dehan fila fali iha Novembru laran sei hatan ba preokupasaun husi Parlamentu Nasional karik hodi aprova Orsamentu 2026, neebe fulan Novembru tomak kala atan oan hau labele pasiar,” hatete Xefe Governu.
Nia dehan, hotu hotu sei lembra katak, fulan mai sei selebra tinan 50 s proklamasaun unilateral no tinan ida nee, selenbra tinan 50 no iha loron 7 Dezembru tinan 50 tan.
“Horibainrua halao tiha konsulta publika ba politika ekonomia azul, bolu konsulta publiku nee ba liu Mnisipiu Autoridade Munisipais, Postu Administrativu too Xefe Suku,” dehan nia.
Nunee mos Prezidente Republika (PR), Jose Ramos Horta hatete, Timor Leste nia adezaun ba ASEAN iha loron 26 Outubru serbisu hahu todan.
“Balu hanoin ita tama iha 26 mak nee ona ita tama ona ASEAN, ita tama hahu serbisu todan liu tan, hau hakarak haree asesor barak barak iha Governu nee, matenek boot la hatene sira matenek duni hau hatene sira manan osan boot, maibe iha rai balun rai seluk o kuandu manan osan boot nee tanba matenek boot, iha Timor hau lahatene se asesor sira manan osan boot nee signifika matenek boot, maibe realidade mak ida nee hahu 26 Outubru ba oin serbisu sei todan liu tan,” dehan Prezidente Republika Jose Ramos.
Jornalista: Emerenciana Pinto
Editora: Carme Ximenes
