KUALA LUMPUR, STLTIMORLESTE.com – Malaysia ho Timor Leste, liu husi Ministru Transporte no Komunikasaun (MTK) Miguel Marques Gonçalves Manetelu ho Ministru Komunikasaun Malaysia nian, Ahmad Fahmi bin Mohamed Fadzil, asina ona Memorandu Entendimentu ka Memorandum of Understanding (MoU) ida atu servisu hamutuk iha dezenvolvimentu setor telekomunikasaun nian.
MoU nee ho objetivu atu hametin kooperasaun bilateral iha setor telekomunikasaun neebe kobre infraestrutura, servisu no asuntu regulatoriu, bazeia ba resiprosidade no benefisiu mutual.
Area prinsipal sira kooperasaun nian mak interkambiu konhesimentu tekniku no pratika diak, kapasitasaun institusional, promosaun peskiza no inovasaun teknolojika, no mos fasilitasaun parserias entre entidade reguladora, operador no ajente sira setor nee nian hosi nasaun rua nee.
Akordu nee mos prevee programa formasaun, workshop no interkambiu tekniku, hodi kontribui ba dezenvolvimentu setor telekomunikasaun neebe modernu, seguru no efisiente liu, neebe esensial ba progresu ekonomiku no prosesu integrasaun rejional Timor-Leste nian iha espasu ASEAN.
Ministru Transporte no Telekomunikasaun (MTK) Miguel Marques Gonçalves Manetelu katak benefisiu husi asina MoU nee mak Timor Leste hanesan nasaun neebe mak foun presiza troka konhesimentu iha kolaborasaun ba dezenvolvomentu infraestrutura, liu-liu iha area telekomunikasaun nian.
“Memorandu Entendimentu neebe ita atu asina kona-ba kooperasaun iha Kampu Telekomunikasaun nian maka pasu ida neebe maka importante. Ida-nee muda ita-nia relasaun bilateral sira ba setor ida neebe kritiku no transformativu futuru dijital,” hatete Ministru Manetelu liu husi nia diskursu iha Salaun Hotel Pullman, Kuala Lumpur, Malaysia Sabadu (25/10/2025)
Governante nee afirma, Timor Leste hanesan nasaun neebe foun tanba nee presiza hasae konhesimentu iha area setor telekomunikasaun nian liu-liu dezenvolve setor infraestrutura sira.
“Ita espera katak liu husi asina MoU nee parte autoridade telekomunikasaun husi Timor Leste no Malazia nian ba oin bele serbisu hamutuk lalais,” dehan nia
Nia mos agaradese ba Ministru Komunikasaun Malaysia neebe bele kontaktu direita parte Meta, Google nomos Tiktok atu hare mos oportunidade iha Timor-Leste tanba ema barak uza media sosial la ho responsabilidade.
“Dala ruma Meta, Google nomos Tiktok hare Timor-Leste hanesan nasaun kiik maibe ho ita nia adezaun ba ASEAN nee ita familia boot tanba ho ita nee total familia iha ASEAN nee kuaze millaun 700 ital neebe laos merkadu kiik,” dehan nia.
Ezekutivu nee mos lori Governu Timor-Leste hato agradesimentu klean ba Ministru Fahmi, ba ospitalidade neebe makaas no konvite neebe maka diak ba eventu signifikativu ida-nee.
Fatin hanesan Ministru Komunikasaun Malaysia, Datuk Ahmad Fahmi Bin Muhamad Fadzil, hatete Malaysia sei servisu besik ho Timor-Leste atu dezenvolve infrastrutura telekomunikasaun nian hodi fo benefisiu ba povu rai rua nian no hametin relasaun entre ema ho ema.
Nia informa, Ministeriu Transporte no Komunikasaun TL interesante tebes ba asuntu komunikasaun sosial, no haruka ona ninia tekniku balun mai vizita TL
“Ami haruka ona ami nia team Malaysia Telecommunication Regulator iha TL atu halo diskusaun ho counterpart no haree oinsa mak ami bele halo kolaborasaun,” afirma Ministru Datuk Ahmad Fahmi Bin Muhamad Fadzil
Molok nee iha loron Kuarta Feira (22/10/2025), governu liu husi reuniaun Konsellu Ministrus delibera hodi autoriza Ministru Transporte no Komunikasaun, Miguel Marques Gonçalves Manetelu, asina MoU ida entre Governu Republika Demokratika Timor-Leste no Governu Malaysia kona-ba kooperasaun iha ambitu telekomunikasaun.
(alb)
