DILI, STLTIMORLESTE.com – Prezidente Republika (PR), Jose Ramos Horta halao enkontru ho Prezidente Konselhu Europeu hodi hametin parseria rai rua iha futuru.
Iha loron Segunda (27/10/2025) iha Kuala Lumpur, Prezidente Republika Jose Ramos Horta halao enkontru bilateral ida ho Prezidente Konselhu Europeu, Antonio Costa. Enkontru nee akontese iha marjen Simeira ASEAN ba dala-47 iha Kuala Lumpur, Malazia.
Diskusaun produtiva nee foka hodi hametin liu tan parseria forte entre Uniaun Europeia no Timor Leste, no Prezidente Ramos Horta salienta projetu dezenvolvimentu nasional importante sira neebe presiza kooperasaun kontinua.
Prezidente refere ba konstrusaun hospital referal lima no ponte balun iha territoriu laran, projetu krusial sira hodi hadia infraestrutura no servisu publiku iha Timor Leste.
Prezidente Ramos Horta mos aprezenta projetu nasional “One Seed”, inisiativa inovadora ida neebe foka ba kaptura karbonu no investimentu diretu iha komunidade lokal sira. Prezidente espresa agradesimentu ba apoiu vital UE nian hodi haluan projetu nee ba munisípiu ualu, hodi sublina ninia importansia ba dezenvolvimentu sustentavel no asaun klimatika.
Hodi afirma progresu Timor Leste nian, Prezidente Ramos-Horta deskreve nasaun nee nuudar nasaun neebe estavel tebes ho dezenvolvimentu ekonomiku neebe forte.
Xefe Estadu hatudu ba konfiansa investidor sira-nian neebe aumenta daudaun hafoin adezaun nasaun nian ba ASEAN, hodi sita nuudar ezemplu estaleiru foun neebe oras nee daudaun konstroi hela husi investidor Japaun nian.
Iha palku internasional, Prezidente Ramos Horta hametin nesesidade global ba Uniaun Europeia ida neebe forte no empenadu atu sai nuudar konstrutor ponte entre nasaun sira neebe iha konflitu. Prezidente mos apela ba UE atu konsidera prienxe fatin mamuk neebe husik hela husi redusaun asistensia USAID nian iha area krítika sira, liuliu iha Mianmar no Sudan Sul.
Hodi remata ninia intervensaun, Prezidente espresa ninia preokupasaun kona-ba redusaun resente prezensa reprezentativa Uniaun Europeia nian iha Timor Leste, hodi enfatiza importansia prezensa diplomatika neebe forte.
Iha ninia resposta, Prezidente Konselhu Europeu, Antonio Costa elojia Timor Leste nuudar referensia global ho ninia respeitu neebe metin ba Lei Internasional no ninia kompromisu klean ba pas, rekonsiliasaun no integrasaun internasional. Nia dehan katak Timor-Leste sai ona “modelu ezemplar ba rejiaun no mundu.”
Prezidente Antonio Costa remata hodi asegura ba Prezidente Ramos-Horta katak Timor-Leste bele kontinua konta ho apoiu firme husi Uniaun Europeia.
Jornalista: Emerenciana Pinto
Editor: Xisto Mendonça
