DILI, STLTIMORLESTE.com – Sekretáriu Estadu Arte no Kultura (SEAK), Jorge Soares Critóvão introdus ba Primeiru Ministru (PM), Kay Rala Xanana Gusmão kona-ba preparasaun ekipa Timor Leste (TL) nian neebe sei ba partisipa esposizaun daruak iha Biennale di Venezia, Italia, iha Maiu 2026.
Oras nee daudaun Governu iha hela faze preparasaun, nunee Jorge Soares Critóvão introdus ba Xefe Governu, tanba espozisaun nee sei partisipa husi joven Timoroan talentozu sira nuudar marka partisipasaun dahuluk TL nian iha eventu global ba arte kontemporanea boot-liu iha mundu.
SEAK introdus mos Loredana Pazzini-Paracciani nuudar Kuradora Pavilion TL nian ba esposizaun Biennale di Venezia ho nia servisu maka halo selesaun no prepara artista Timoroan sira neebe bele reprezenta TL iha espozisaun nee.
Oras nee daudaun iha ona artista Timoroan talentozu nain-tolu mak selesionadu atu partisipa iha eventu mundial nee mak hanesan Etson Caminha, Juventino Madeira ho Veronica.
Artista nain-tolu nee selesionadu liu-husi konkursu publiku ba Timoroan sira iha rai laran no rai liur neebe aplika hamutuk nain-35 liu-husi submisaun dokumentus too entrevista.
Nunee sei iha aprezentasaun obra ida husi Artista Verônica ho kombinasaun muzika tradisionais TL nian ba muzika kultura ASEAN, husi artista Etson Caminha no Juventino Madeira sei halo video-mapping liga ba kultura no identidade TL nian.
“Primeiru Ministru husu atu kontínua prepara didiak obra sira neebe reprezenta identidade Timor nian ho kualidade, nunee ema iha neeba bele hatene diak-liu TL liu husi arte no kultura ida-nee,” esplika nia iha Palásiu Governu, Sabadu (15/11/2025).
Iha Abril 2024 TL partisipa ona iha esposizasaun Arte Internasional ba dala-60 neebe halao iha sidade Biennale di Venice-Italia neebe partisipa husi nasaun 90.
Momentu neeba TL hola parte hodi promove mos obra arte konteporanea oin-oin no lansa filme “Kiss and Dont Tell” ka Rei, maibé labele koalia, neebe prepara husi Artista Maria Madeira, apoia husi Kuradora Professora Natalie King no ekipa produtor filme husi Australia, Artista Timor-oan, Alfeu Pereira ho pintor sira husi Grupu Arte Moris no Fundasaun Alola.
Jornalista: Alberto Menezes
Editora: Domingas Gomes
