DILI, STLTIMORLESTE.com – Bankada Partidu Libertasaun Popular (PLP) husu Ministeriu Interior (MI) atu tau atensaun seriu ba kondisaun saude membru polisia sira nia, tanba sira dedika sira nia aan atu servi estadu ida nee, liu-liu garante pas no estabilidade.
“Hau husu Ministru Interior favor ida tau atensaun hela ba membru polisia sira nia bens estar, liu-liu membru sira neebe la iha kargu, tanba ikus-ikus membru PNTL barak mak idade produtivu hela maibe mate,” rekomenda Deputada Maria Angelina Sarmento, wainhira debate OJE tinan fiskal 2026 ba Ministeriu Interior iha faze espesialidade, liu husi plenaria PN, Kuarta (19/11/2025).
Nia dehan, Governu liu husi Ministeriu Interior presiza tau atensaun ba membru PNTL, tanba sira tinan barak ona dedika sira nia aan hodi servi intituisaun PNTL.
“La hanesan ho membru F-FDTL sira neebe kada fulan obrigaatoriu tenke halo tratamentu saude regular, nunee bele hatene sira nia kondisaun nee, mais hau haree membru polisia sira nee la iha, presiza tau atensaun ba sira nia bem estar liu-liu ba saude,” dehan nia.
Hatan ba kestaun nee, Ministru Interior (MI), Francisco da Costa Guterres katak, iha tinan 2025 asosiasaun espoza PNTL hahu servisu hamutuk ho Unidade Mediku PNTL, hodi halo tratamentu saude ba membru polisia sira.
“Asosiasaun Espoza PNTL oras nee servisu hamutuk ho Unidade Mediku Polisia iha tinan nee hahu halo tratamentu saude ba membru polisia sira hahu husi fronteira, liu-liu membru ba UPF sira nia kondisaun,” hatan MI, Francisco.
Governante nee dehan, Komando PNTL mos estabelese ona klinika ida iha Sentru Formasaun Polisia, Komoro, no durante nee membru polisia barak mak ba halo ona tratamentu ba sira nia saude iha fatin refere.
“Klinika ida agora iha hela Komoro nee destinadu ba membru polisia, ba membru polisia sira neebe senti sira nia saude ladun diak bele ba halo tramentu gratuita iha fatin neeba,” dehan nia.
Nia mos dehan, iha OJE 2026 PNTL aloka orsamentu oituan hodi halo tratamentu ba membru polisia sira nia saude.
Jornalista: Alberto Menezes
Editora: Carme Ximenes
