DILI, STLTIMORLESTE.com – Timor Leste (TL) selebra 28 Novembru hodi selebra tinan 50 proklamasaun unilateral independensia TL, nee tanba sakrifisiu husi luta nain sira, sakrifika aan barak mate hodi lori rai nee hetan independensia, tanba nee presiza hametin unidade nasional.
Kestaun nee hatoo husi Reitor UCT, Padre Joel Casimiro Pinto ba jornalista iha UCT Balide, Tersa (25/11/2025).
Nia dehan, TL selebra tinan 50 proklamasaun unilateral independensia TL nian, nee laos buat fasil maibe nee tanba sakrifisiu no luta makaas too luta nain barak mate no fakar ran mak lori rai nee ba hetan ukun rasik aan, tanba nee nafatin valoriza sira nia luta liu husi hametin unidade nasional.
Padre dehan, proklamasaun independensia laos mosu derepente deit, maibe prosesu neebe halakon ema barak vida, tanba nee husu nafatin valoriza.
“Hatoo parabens ba Timor Leste neebe tinan nee selebra proklamasaun unilateral independensia ba dala-50. Ida nee atu fo hanoin ba ita hotu katak, independensia nee laos buat ida neebe mosu mai derepente deit, nee prosesu ida-neebe naruk halakon mos ema barak nia moris, sakrifika mos ema barak nunee ita presiza kontrola no tau matan didiak ba ai-hun Timor ida-nee atu bele buras ba nafatin, atu bele tau matan ai-hun ida-nee bele buras no fuan barak ba aban bainrua, hau hanoin presiza unidade nasional ida,” dehan Reitor UCT nee.
Padre hatete, unidade nasional nee hahu husi lider rezistensia sira presiza tuur hamutuk hodi rekoinese idak idak nia parte hodi kontribui lori rai nee ba oin ho diak.
Padre dehan, Polítika nee sempre iha amigu no adversariu, la hasee oin ba malu nee normal, nee politiku maibe hanesan família boot Timor nee tenke hamutuk nafatin.
Nunee mos Primeiru Ministru Kay Rala Xanana Gusmao husu hotu-hotu atu hakruk ba eroi sira neebe fo an ba mate iha tinan 50-liuba hodi Timor Leste proklama unilateralmente independensia (28 Novembru 1975 – 28 Novembru 2025).
Jornalista: Emerenciana Pinto
Editora: Domingas Gomes
