DÍLI, STLTIMORLESTE.com – Prezidente Komisaun Rekrutamentu Hospital Nasionál Guido Valadares (HNGV), Vidal de Jesus Lopes afirma katak, ekipa júri la fó sai materia teste eletróniku ba kandidatu.
Vidal esplika katak, HNGV loke vaga hamutuk 478, ho prosesu rekrutamentu ne’ebé sei hala’o liuhusi faze tolu: seleksaun dokumentu, teste eletróniku no entrevista.
Nia hatete katak, iha faze inisiál, kandidatu na’in 8.000 resin mak submete aplikasaun. Husi númeru ne’e, kandidatu na’in 6.448 mak pasa ba faze tuirmai.
Iha teste eletróniku, pergunta sira prepara tuir área profisionál ida-idak, inklui médiku jerál, enfermeiru, parteira, tékniku aliadu, radiolojia, banku ran, farmásia no nutrisaun.
Alegasaun kona-ba vazamentu materia mosu depois pergunta balu ba médiku jerál, ho referénsia CP1, espalha iha mídia sosiál, ne’ebé hamosu suspeita kona-ba prosesu teste.
Vidal de Jesus Lopes hatete katak, kandidatu sira iha direitu atu estuda no prepara an liuhusi livru no referénsia oioin, inklui materiál relevante ba área espesializada.
“Ekipa de júri ami la hasai materiál teste eletróniku nee ba kualker kandidatu ida,” haktuir nia ba jornalista iha HNGV Bidau, Segunda (09/11/2026).
Nia afirma katak, to’o agora, komisaun seidauk simu karta reklamasaun ofisiál husi kandidatu sira kona-ba alegasaun ne’e.
Maski nune’e, komisaun akompaña hela informasaun ne’ebé viraliza iha mídia sosiál, inklui imajen pergunta no dokumentu referénsia ne’ebé utiliza iha ospitál.
Vidal esplika katak, HNGV la’ós de’it ospitál ne’ebé fó atendimentu saúde, maibé mos hanesan ospitál ensinu (teaching hospital), ne’ebé uza referénsia edukasionál oioin.
Nia afirma katak, depois informasaun kona-ba alegasaun vazamentu sai, komisaun halo enkontru no investigasaun interna atu verifika faktu sira.
Entretantu, prosesu rekrutamentu sei kontinua tuir faze sira ne’ebé determina ona, ho vaga hamutuk 478 ba kandidatu sira ne’ebé kumpre kritériu seleksaun.
(dom)
