DÍLI, STLTIMORLESTE.com – Kandidatu 2.072 mak hetan rezultadu pozitivu iha teste eletróniku ba vaga servisu iha Hospital Nasionál Guido Valadares (HNGV).
Prezidente Komisaun Rekrutamentu HNGV, Vidal de Jesus Lopes, hateten informasaun ne’e ba jornalista sira iha HNGV, Segunda-feira (09/11/2026).
Nia esplika katak, prosesu rekrutamentu ne’e liu ona fase rua, inklui seleksaun dokumentu no teste eletróniku, ne’ebé hala’o liuhusi sistema Komisaun Funsaun Públika.
“Iha fase teste eletróniku, kandidatu 2.072 mak liu. Husi kandidatu 8.000 resin, númeru ne’e menus ona ba 2.000 resin,” Vidal de Jesus Lopes afirma.
Nia hatutan katak, durante prosesu seleksaun fase rua, kandidatu 6.000 resin la konsege kontinua ba fase tuirmai.
Maski nune’e, kandidatu sira ne’ebé la satisfás ho rezultadu iha oportunidade atu halo reklamasaun, tuir mekanizmu ne’ebé estabelese iha prosesu rekrutamentu.
Vidal afirma katak, husi kandidatu 2.072 ne’ebé liu teste eletróniku, komisaun sei halo seleksaun tan, ho objetivu atu elimina kandidatu 1.700 resin.
Nia mós hateten katak, kada fase iha prosesu rekrutamentu hasoru dezafiu rasik, maibé komisaun sei kontinua tuir prosedimentu ne’ebé aplika.
Kona-ba reklamasaun, komisaun loke oportunidade ba kandidatu sira hahu Segunda-feira to’o Sesta-feira, atu hato’o reklamasaun kona-ba rezultadu teste eletróniku.
(dom)
