DILI, STLTIMORLESTE.com – Prezidente Republika (PR), Jose Ramos Horta konsidera Universidade Catolika Timorense (UCT) kualidade diak no top klase.
Prezidente Republika Jose Ramos Horta hatoo kestaun nee ba jornalista bainhira remata vizita Expo iha salaun UCT Balide, Tersa (25/11/2025).
Nia hatete, tuir Prezidente UCT kualidade diak no top klase nivel diak hodi kontribui ba nasaun.
“UCT nee universidade neebe diak tebes, parabens ba Amo sira ba reitor universidade nee top klase nivel diak tebes kontribui diak ba nasaun ida nee rai ida nee, hau agradese ba Amo Cardeal ba padre sira neebe ho esforsu harii UCT laos fasil, tau osan boot,” dehan Prezidente Horta.
Iha fatin hanesan Reitor UCT, Padre Joel Casimiro Pinto hatoo agradese ba Prezidente Republika Jose Ramos Horta neebe hasai liafuan sabedoria ida nee hanesan enkoramentu ida ba sira, nunee bele kontinua luta ba oin diak liu tan.
“Hau agradese ba Prezidente Republika nia liafuan sira neebe nakonu ho sabedoria, neebe enkoraza nafatin joven Timoroan liu-liu sira neebe estuda iha nee nunee bele aproveita liu tan,” dehan Reitor nee.
Reitor nee katak, laos orgullu ho liafuan husi Prezidente hodi para ona, maibe ho enkorajamentu sira husi Prezidente nia bele motiva nafatin sira hodi dezenvolve universidade ho diak liu tan iha futuru.
“Husi liafuan hirak nee hanoin loos duni nee laos atu gava deit, maibe UCT tenke hanoin ba aban bainrua nian, tinan oin ka tinan hirak mak atu dezenvolve liu tan, halo kualidade nee sae liu tan, ho formasaun ida neebe diak ba foinsae sira liu-liu Timoroan sira,” dehan nia.
Jornalista: Emerenciana Pinto
Editora: Domingas Gomes
