BAUKAU, STLTIMORLESTE.com – Durante kalan tolu (3) ona joven sira iha Bairu Rumah Sangat Sederhana (RSS) Vila Nova, Postu Administrativu Baukau Vila, Munisipiu Baukau, ataka malu ho katana no fatuk, rezulta komunidade nia uma balu rahun.
Komunidade RSS bloku B, Jaime Ximenes Belo haktuir, konfrontu nee akontese hahu iha loron 24 Novembru 2025 too iha loron 26 Novembru 2025 nee, kuaze iha tempu kalan joven sira husi bloku balu iha area RSS Vila Nova Baukau ataka malu ho katana, ai no fatuk, rezulta uma komunidade nian balu janela rahun, tanba hetan tuda.
Motivu ba konfrontu nee, Jaime komenta kauza husi provoka malu.
“Kalan tolu ona nee akontese hela deit, mai ho katana, fatuk ai duni malu. Polisia mai mais ema barak tuda malu Polisia tiru gas air mata mos la auguenta. Iha balu dehan kanek mais lori ba ospital ita la hatene se mak kanek,” Jaime hateten ba jornalista sira, iha RSS bloku B, Kinta (27/11/2025).
Komunidade nee preokupa ho asaun jovem sira nian, tanba tuda malu iha tempu kalan hodi rezulta uma komunidade sira nian hetan tuda fo impaktu ba komunidade sira nia deskansa iha tempu kalan, tanba trauma.
Nia argumentu, situasan iha Munisipiu Baukau kauze atu hakmatek ona, tanba iha bairo seluk tempu kalan hakmatek, enkuantu iha RSS jovem sira tuda malu.
“Nee mak ami husu seguransa patrulha took iha tempu kalan nee rutin, ka buka tuir took ida neebe mak recana,” Jaime sujere.
Enkuantu Agostinho Domingos Cabral da Costa hateten, nia parte laiha koinhesementu kona-ba komfrontu iha area RSS, maibe nia uma hetan estragus husi grupu deskonhesidu sira iha loron 27 Novembru 2025 parte tuku rua madrugada.
“Ida nee hau la hatene, kalan okmun ida mak hau dudu tama motor nia foti fatuk tuda hau iha uma oin nee, hau intensaun atu haree se mak tuda neebe kalan nee hau hamriik iha oin haree sira parte leten nee mak tuda tun mai ami kaer lampra leno oin koinhese deit ema nee dadersan keixa ba Polisia, loraik ami Polisia sira ba ema nee laiha tiha ona kalan nee mak sira mai asaltu fali uma nee ho grupu,” Agostinho konta.
Nia sublina, iha loron 26 Novembru 2025 parte tuku 22:00 kalan grupu balu hahu atake uluk nia uma, maibe nia parte hetan apoiu husi vizinhu sira hodi grupu refere la halo asaun. nunee sira kuaze toba ona, maibe too iha loron 27 Novembru 2025 parte tuku 02:00 madrugada, grupu refere mosu hikas ho katana, ai no fatuk hodi harahun janela uma hela fatin.
Nia fundamenta, ema hirak neebe involve iha grupu refere hodi harahun uma, nia parte konhese no daudaun kazu refere iha ona Komando Polisia Munisipiu Baukau nia liman.
“Nia motivu hau la hatene ida, tanba hau mai mai derepente, hau keixa atu rezolve problema, entaun sira mai fali ho asaun nee mak hau komprende tansa sa mak hanesan nee,” Agostinho preokupa.
Uma nain nee husu ba Komando Polisia Munisipiu Baukau, atu buka tuir autor sira ba asaun refere hodi submete ba prosesu investigasaun, nunee hatene motivu ba komfrontu refere, tanba nia parte la hatene motivu ba komfrontu refere, maibe sai vitima, tanba uma hetan estraga.
Enkuantu tuir informasaun neebe STL asesu husi labarik estudante sira iha area RSS bloku B, uma komunidade sira nian kauze hetan tuda, maibe hetan estragus janela rahun iha 2.
Liga asuntu nee STL tenta konfirma Komadante Komando Polisia Munisipiu Baukau, maibe laiha fatin atu fo komentariu.
Jornalista: Tomas Reis
Editora: CarmeXimenes
