DILI, STLTIMORLESTE.com – Estudante Timor Oan iha Yogyakarta (STELAR) realiza atividade oin-oin, hodi komemora loron Proklamasaun Independensia Unilateral ba dala 50.
Iha biban nee Estudante, Caetano Jose Freitas ba STL Segunda (01/12/2025) hatete, iha loron importante STELAR (Student of Timor Leste for Academic Reinssance ka STELAR), realiza atividade oin oin hodi komemoras selebrasaun tinan 50 proklamasaun Unilateral ba dala 50, iha YogYakarta.
“Atividade neebe ami STELAR-Yogyakarta (Student of Timor Leste for Academic Reinssance) halo, hodi Komemora Loron Proklamasaun Independensia Unilateralmente RDTL ba dalda 50 mak Webinar, (halao iha 27/11/2025), Missa Agradesimentu (Halao iha 28/11/2025) Desportu Futsal (halao iha 29/11/2025,” dehan nia.
Nia hatete, iha selebrasaun misa agradesementu ba tinan 50 proklamasaun Unilateral preside husi padre Padre Paskalis Sugi, Cmf , Padre Co-Celebrante Padre Ponsianus Ladung, Cmf no Missa Agradsimentu nee halao iha Wisma Skolastikat Claretian (Cmf), Yogyakarta.
No Missa Agradesimentu nee partisipa husi Estudantes Timor Oan iha Jogja neebe hamahan-an iha STELAR, Religiosa/o Timor Oan sira iha Jogja, Madre, Frater, Bruder, nomos Familia Timor oan neebe hela iha Jogja no Total partisipantes 140 resin.
Liu husi komentariu nia hatoo agradese ba Padre selebrante maluk estudante no familia hotu neebe hamutuk hodi selebra misa agradesementu hodi komemora loron proklamasaun Unilateral Indepedensia Timor Leste ba dala 50.
Iha biban nee nia hatoo Mensajen ba foinsae sira atu kontinua luta tuir eroi sira nia dalan hodi kontribusi ba Dezenvolvimentu Nasional.
“Iha Komemorasaun Loron Proklamasaun Unilateral Independensia Republika Demokratika de Timor Leste (RDTL) ba dala 50 nee , mai ita hamoris hikas espíritu eroi sira neebe liu tiha ona antes ita. Ba joven sira Timor Leste nian luta nafatin ho korajen, onestidade no serbisu loloos. Independensia laos istoria deit ita hotu nia responsabilidade atu harii nasaun ida neebe forte liu, justu liu, no iha esperansa liu. Imi nia kontribuisaun ohin loron sai warisan ba jerasaun aban bainrua nian,” katak nia.
Nia hatutan, nuudar Timor oan esperansa ba oin, ho Komemorasaun Loron Proklamasaun Independensia Unilateralmente RDTL ba dala 50 nee, hotu-hotu simu hela responsabilidade atu kontinua dalan Heroi sira, Lider sira nian no hadia nafatin nasaun ida-nee ba dezenvolvimentu ida diak liu.
Nuudar foinsae no nudar intelektuais jerasaun foun husu ba Lider tuan sira hamutuk atu lori nasaun ba Dezenvolvimentu liu tan. Maske nasaun nee nasaun Demokratika no ema hotu hotu bele iha diferensia idea, Maibe assunto nasional (Dezenvolvimentu Nasional) husu Lider tuan sira hamutuk ba atu hadia. Hatudu hela imi nia Unidade neebe imi hatudu tena iha dekada hirak liu ba kotuk.
Jornalista: Emerenciana Pinto
Editora: Carme Ximenes
