AMBENO, STLTIMORLESTE.com – Prezidente Autoridadade Rejiaun Administrativa Espesial Oecusse-Ambeno (PA-RAEOA), Regio da Cruz Salu dehan, nia halo deit aprovasaun ba pedidu atu apoiu orsamentu ba servisu kobertura media nian ba komemorasaun loron proklamasaun Unilateral Independensia Timor Leste (TL) ba dala 50 iha tinan 2025 nian, kona-ba kestaun ida diskrimisaun jornalista nasional destakadu iha Oecusse nee, depois mak hatoo ba komisaun organizadora sira, tanba orsamentu ba media nian nee komisaun organizadora sira mak ezekuta.
“Hau pesoalmente nee, la halo diskrimisaun, hau so hetan deit pedidu atu apoiu orsamentu ida kona ba servisu kobertura mídia nian ba komemorasaun loron proklamasaun Unilateral Independensia TL ba dala 50 tinan nee 2025 halao iha Oecusse iha 28 Novembru semana kotuk nee. Orsida loraik ami halo evaluasaun, tanba kestaun nee orsida hau sei hatoo ba komisaun organizador sira” hatete PA-RAEOA Regio da Cruz Salu ba Jornalista sira Iha salaun Multiuzu 1 de Maiu Palaban, suku Costa, Postu Administrativu PanteMakasar, RAEOA (02/12/2025).
Nia haktuir tan katak, Autoridadade RAEOA orsida hamutuk ho komisaun organizador sira ba selebrasaun loron proklamasaun Unilateral Independensia Timor Leste 28 Novembru tinan nee iha Oecusse, atu nunee hatoo kestaun nee ba sira atu ba oin bele hadia servisu.
“Ita hotu halo serbisu kolen, hodi promove imajen Oecusse neebe furak ba publiku hotu, kona-ba preokupasaun sira nee, ba oin ita sei haree atu hadia, nuudar Oecusse oan sei haree preokupasaun ida nee, tanba nee ita hotu nia preokupasaun, hau promete katak orsida ami halo avaliasaun mak hau hatoo asuntu uda nee,” promete PA-RAEOA.
Deskonfia Asesor Media GPA-RAEOA Diskrimina Jornalista Destakadu
Iha sikun seluk, jornalista Nasional destakadu iha Oecusse neebe lakohi temi naran dehan, deskonfia Assesoria Media Gabinete Prezidente Autoridade Rejiaun Administrativa Espesial Oecusse-Ambeno (GPA-RAEOA) mak halo diskiminasaun ba jornalista nasional destakadu iha Oecusse neebe halo serbisu hanesan ho kolega jornalista sira husi nasional.
“Ami deskonfia asesor Media GPA-RAEOA maka halo diskriminasaun ba ami jornalista nasional destakadu iha Oecusse ba kobertura selebrasaun loron proklamasaun Unilateral Independensia Timor Leste ba dala 50 neebe realiza iha loron Sesta (28/11/2025) iha Oecusse, Lideradu husi Oteliu Ote (Eis Prezidente Konselhu Imprensa Timor Leste) hatama proposta ba PA-RAEOA ho montante osan hamutuk 11.000, atu fasilita media halo kobertura,” dehan nia.
Nia haktuir tan katak, Asesor media GPA lalin Jornalista sira hosi nasional neebe laos atu halo transmisaun direita, maibe halo kobertura baibain hanesan Jornalista destakadu sira iha RAEOA.
“Ami laos husu perdiam maibe ami nia preokupasaun durante nee hatoo ona ba Gabinete Media neebe lidera husi Maun Otelio Ote katak, durante nee ukun nain sira neebe troka malu hela deit iha Oecusse atu assume knaar Prezidente Autoridade, sempre halo diskriminasaun mai ami, maske durante nee sira nia programa neebe halao loron-loron iha Oecuse, ami mak sempre hamutuk ho sira hodi promove, maibe eventu boot hanesan nee, la konsidara ami no pior liu tan maka lalin jornalista sira husi nasional hodi hatodan espezas publiku, pior liu maka ami deskonfia, fo prioridade ba ninia jornalista husi Lifau press hodi halo kobertura iha suku no iha posibilidade hetan osan husi aprovasaun PA-RAEOA iha Oecusse, tanba sira ba halo kobertura iha suku sira iha eventu komemorasaun loron boot nee iha nasaun TL,” dehan fontes Jornalista neebe la kohi temi nia naran.
Autoridadade RAEOA fasilita Jornalista nasional Sira hamutuk nain 8 husi nasional, ema ida hetan Osan $120 ba loron 3 nian, realidade neebe iha Autoridadade RAEOA la konsege apoiu nesesidade orsamentu ba Jornalista destakadu sira iha RAEOA durante semana ida iha serimonia isar bandera ba komemorasaun loron proklamasaun unilateral Independensia ba dala 50 neebe realiza iha Oecusse tinan 2025.
Tuir informasaun neebe asesu katak, orsamentu neebe Autoridadade RAEOA apoiu ba servisu kobertura media nian iha komemorasaun loron proklamasaun Unilateral Independensia 28 Novembru ba dala 50 iha Oecussem hamutuk US$ 11.000.
Antes nee Asesoria Asuntu Media, Gabinete Prezidente Autoridade RAEOA liu husi mensajen iha WA Grupo Jornalista Oecusse nian nomos SMS privadu atu halo kobertura iha Suku sira iha area rurais Oecusse, hetan osan perdiam maibe jornalista nasional destakadu iha Oecusse ema nain ida deit, entaun foku kobertura ba prezensa Primeiru Ministru Kay Rala Xanana Gusmao ninia vizita trabalhu iha Oecusse nomos isar bandera nasional iha Oecusse maka la ba iha area ruais hamutuk ho lideransa komunitariu hodi halo kobertura iha neeba.
Tuir informasaun neebe STL rekolha husi jornalista media nasional neebe halo kobertura iha Oecuse katak, tuir loloos jornalista nain 8 nee halo kobertura iha Oecusse durante loron 5, ema ida tenke hetan osan perdiam US$ 200 maibe realidade sira simu deit US$ 120 ba loron 3 nian deit.
Jornalista: Joseph Koa
Editor: Joseph Koa
