DILI, STLTIMORLESTE.com – Timor Leste (TL) nia adezaun ba ASEAN, ida nee fo mos oportunidade ba feto oinsa kapasita aan ho diak, hodi bele kontribui ba iha konstrusaun estadu.
Kestaun nee hatoo husi Diretora AUFD, Bendita da Costa de Jesus ba STL, liu husi telefone, Kuarta (03/12/2025).
Nia husu feto Timor Leste liu liu feto potensial feto politiku nain no feto matenek nain sira katak, oras nee Timor Leste Adere ona ba ASEAN nee oportunidade diak ba feto hotu hotu.
“Timor Leste adere ona ba ASEAN nee oportunidade diak ba feto hotu hotu, bazeia ba ita nia haree no ema barak nia komentariu katak TL nia adezasaun nee ladun diak tanba Timor Leste lahetan benefisiu ruma razaun nasaun Timor sei hasoru dezafiu oin oin, maibe ita haree katak dezafiu nee mak sai oportunidade, no oinsa mak dezafiu sira nee ita ultrapasa hodi hasoru ida nee sai hanesan oportunidade diak ida atu bele kontribui ba iha ita nia rai hodi sai mos hanesan mos nasaun asean sira seluk,” dehan Bendita.
Nia hatete, husi dezafiu neebe mak Timor Leste hasoru hamutuk fo hanoin no idea neebe mak diak husi asaun diak sira, hodi bele ultrapasa dezafiu hotu nunee lori nasaun nee ba oin.
“Husi Dezafiu neebe ita nia nasaun hasoru liu liu ita feto situasaun barak mak ita hasoru liga ba oinsa feto hetan oportunidade, oinsa bele feto bele foti desizaun husi Familia kultura, ita nia partisipasaun nee ladun masimu ho razaun katak ita labele hetan autorizasaun husi mane maluk sira, nomos liga ba oportunidade liga ba serbisu no seluk tan, ida nee sai hanesan oportunidade diak atu bele esforsu aan atu bele envolve iha kualker atividade no kualker eventu sira liu husi prepara aan husi estuda makaas,” katak nia.
Nia hatutan, maski feto sei hasoru bareira oin oin maibe feto nafatin prepara aan liu husi estuda makaas, no aprende mos husi nasaun seluk sai hanesan referensia ida ba feto oinsa bele kapasita aan individual atu bele hamutuk mane sira hodi kontribui mos ba rai ida nee liu husi ultrapasa dezafiu neebe hasoru. Tanba oportunidade barak mak sei mai.
“Oras nee Timor Leste adere ona ba ASEAN,hanesan feto sente kontente tebes tanba husi oportunidade ida nee bele aprende buat barak, atu bele ultrapasa no feto prepara aan ho diak nunee bele envolve no kontribui ba ita nia rai ida nee, no hadia diak liu tan iha ita nia moris no nesesidade foku liu ba feto nia partisipasaun iha nivel lideransa no ekonomia nia,” katak nia.
Nunee mos Sekretaria Estadu ba Igualdade (SEI), Elvina Sousa Carvalho hatete, Nunu Governu Konstitusional komprimitidu atu investe ba iha dezenvolvimentu feto.
Nunu Governu Konstitusional komprimitidu atu bele atu bele investe iha dezenvolvimentu feto sira hotu iha Timor laran tomak, inklui feto rural sira nomos ita iha Plataforma prinsipal ida ita bolu deklarasaun Maubesi neebe mak tau hamutuk linas Ministerias 17 ho BNCTL, atu bele avansa dezenvolvimentu feto rural sira nomos kria oportunidade ekonomia hakbiit ekonomia feto rural sira,” dehan governante nee.
Nia hatete, SEI hamutuk ho Linas Ministerias sira nafatin avansa hodi dezenvolve feto sira, liu husi deklarasaun Maubesi sei nafatin komprimitidu.
Jornalista: Emerenciana Pinto
Editora: Carme Ximenes
