DILI, STLTIMORLESTE.com – Publiku sempre kestiona kona-ba edukasaun laiha kualidade, tanba problema barak neebe parte edukasaun seidauk halao. Atu alkansa kualidade iha edukasaun, governu liu husi Ministeriu Edukasaun presiza hadia uluk problema balun hanesan falta material didaticos no laboratoriu, tanba nee mak sai problema komum ba estudante oinsa atu aprende nomos profesor sira atu hanorin.
Tuir Estudante Livre Teoria husi Universidade Nasional Timor Lorosae (UNTL), Fakuldade Edukasaun, Angelina Maia de Araujo hatete, educasaun sai hanesan parte formasaun kontinua ida oinsa atu dezenvolve ema nia kapasidade, morais intelektual no sosiais atu prepara ema ida oinsa bele adapta ba iha vida sociedade.
Nia katak, pontus neebe sai hanesan impaktu bá iha educasaun laiha kualidade primeiru mak professor sira neebe hanorin iha materia refere neebe laos nia área espesifiku. Segundu falta material didaticos no laboratorio, tanba nee mak sai problema komum ba estudante oinsa atu aprende nomos professor sira atu hanorin.
“Tuir hau nia hare problema komum hirak nee mak sai impaktu ba iha educasaun laiha nia kualidade. Maibe bainhira governu hadia dadauk ona pontus hirak nee kualidade iha edukasaun bele iha mudansa,” dehan nia bá STL iha Tasitolu, Kinta (15/01/2026).
Nia sujere ba iha parte edukasaun liu-liu Ministeriu Edukasaun nian oinsa atu hadia kualidade neebe diak liu tan presiza tau ema ba iha edukasaun tuir nia área espesifiku, nomos prepara rekursus edukasaun neebe diak, hodi oinsa bele fasilita professor sira atu hanorin iha eskola refere.
Entertantu iha sorin seluk governu liu husi Ministeriu Educasaun (ME), hahu esforsu no servisu makas hodi hadia dadaun kualidade sektor edukasaun hanesan apoiu material komputador, livrus manual, meza kadeira, no halo kontruksaun bá eskola sira neebe presiza atu hadia no rekrutamentu bá professor sira neebe agora kontinua lao hela.
Hanesan foin lalais iha loron 29 Dezembru 2025 foin liu bá governu fo posse ba profesór bolsa kandidatu nain 588 neebe koloka ba iha eskola Ensinu sekundariu sira iha Timor laran tomak.
Iha biban nee Visi Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino apresia ba Ministra Edukasaun no Sekretária Estadu neebe esforsu tebes tuir vizaun estadu nian atu halo selesaun ida neebe diak no kualidade ba profesór sira.
(dom)
