DILI, STLTIMORLESTE.com – Komandante-Jerál Polísia Nasionál Timor-Leste (PNTL), Komisáriu Asistente Afonso dos Santos, husu polísia feto atu sai ezemplu di’ak ba povu.
Afonso dos Santos hato’o pedidu ne’e iha nia diskursu durante atividade iha CCD, Dili, loron Tersa-feira (13/10/2026).
“Ohin prezensa ami iha ne’e atu hato’o buat ruma ba ita-boot sira. Hanesan Komandante-Jerál, objetivu mak polísia feto tenke ba oin,” nia hatete.
Nia afirma katak, polísia feto tenke sai ezemplu di’ak ba sosiedade, hametin lideransa ba futuru no kontinua dezenvolve kapasidade pesoál no profisionál.
Komandante-Jerál mós husu polísia feto hotu atu hatudu profesionalizmu iha servisu, hodi aumenta konfiansa públiku ba instituisaun PNTL.
“Hau husu imi nia prezensa ho profesionalizmu ba polísia feto hotu-hotu. Agora hau propoin 150 pesoál feminina,” nia esplika.
Afonso dos Santos mós husu lideransa PNTL atu kontinua hala’o servisu ho responsabilidade no profesionalizmu, hodi harii instituisaun polísia ne’ebé sai ezemplu di’ak ba sosiedade.
Iha atividade hanesan, Xefe Jéneru PNTL, Superintendente Asistente Maria Fatima, afirma katak formasaun no dezenvolvimentu kapasidade importante atu hametin profesionalizmu no lideransa iha instituisaun.
Nia esplika katak, objetivu prinsipál mak aumenta kapasidade lideransa, hametin disiplina no promove igualdade oportunidade ba polísia feto no mane, lahó diskriminasaun.
Maria Fatima enfatiza katak partisipasaun efetiva no dezenvolvimentu rekursu umanu tenke sai prioridade, hodi prepara lideransa futuru no hadi’a kualidade servisu polísia.
“Ami hato’o agradese ba Komandante-Jerál tanba apoiu no lideransa ne’ebé fó ba organizasaun, atu kontinua dezenvolve kapasidade no prepara lideransa ba futuru,” nia afirma.
Nia aumenta katak, profesionalizmu, respeitu no valór umanu mak prinsípiu fundamentál ne’ebé tenke orienta servisu polísia, inklui respeitu ba komunidade no direitus umanus.
(jen)
