DILI, STLTIMORLESTE.com – Hospital Nasionál Guido Valadares (HNGV) kontinua halo pedidu regular ba aimoruk iha INFPM, tuir nesesidade hospitál no kuantifikasaun anual.
Diretór Servisu Apoiu Diagnóstiku no Terapeútiku HNGV, Vidal de Jesus Lopes hato’o informasaun ne’e ba jornalista sira iha Bidau, Tersa-feira (13/10/2026).
Vidal esplika katak, HNGV kontinua ba foti ai-moruk iha INFPM, tuir nesesidade no kuantidade ne’ebé ospitál submete ona ba instituisaun ne’e.
“Pedidu regular ami halo nafatin. Ami ba foti ai-moruk loroloron iha INFPM, tuir nesesidade no kuantifikasaun anual HNGV nian,” dehan Vidal.
Nia hatete katak, pedidu HNGV nian limita ba nesesidade ospitál rasik, la’ós ba ospitál referál sira seluk.
Vidal afirma katak, INFPM mak fornesedór prinsipál ai-moruk, enkuantu HNGV depende ba fornecimento ne’e atu responde ba nesesidade tratamentu pasiente.
Nia esplika katak, kompania fornesedór ne’ebé iha kontratu ho HNGV bele ajuda responde situasaun emerjénsia, maibé fornese ai-moruk ba loron rua ka tolu de’it, la’ós atu garante nesesidade durante fulan tomak.
“Fornesedór prinsipál mak INFPM. HNGV nu’udar utilizadór, enkuantu kompras, aprovizionamentu, armazenamentu no distribuisaun tama iha kompeténsia INFPM,” nia dehan.
Vidal hatete katak, tuir sistema ne’ebé aplika, HNGV nia responsabilidade mak halo kuantifikasaun no espesifikasaun ai-moruk, depois submete ba INFPM.
Nia subliña katak, instituisaun ida-idak tenke kumpre responsabilidade tuir kompeténsia ne’ebé lei determina, la’ós transfere responsabilidade hotu ba HNGV.
“Ita trata ema nia vida, tanba ne’e ita tenke halo servisu ho honestidade no responsabilidade,” afirma Vidal.
Kona-ba estoke ai-moruk iha HNGV, Vidal hatete katak situasaun kontinua jere tuir sistema institusionál, maibé seidauk bele fó persentajen estoke atual.
Nia esplika katak, presiza konfirma dadus ho parte Farmásia, tanba estoke ai-moruk bele tun no sae tuir nesesidade no movimentu fornesimentu.
(dom)
