BAUKAU, STLTIMORLESTE.com – Autoridade Munisipiu Baukau hamutuk ho Servisu Munisipal Edukasaun Baukau ofisialmente lansa Programa Merenda Eskolar ba anu letivu 2026 iha Munisipiu Baukau.
Sekretaria Munisipal Asuntu Sosial, Maria Celestina Viegas hateten, implementasaun programa merenda eskolar iha Munisipiu Baukau ba anu letivu 2026 diak liu tinan hirak ba kotuk, tanba iha tinan 2024 implementa iha fulan Marsu no tinan 2025 implementa iha fulan Fevereiru, maibe tinan 2026 implementa kedas iha inisiu prosesu aprendizajen anu letivu 2026 nian hahu.
“Foin daudauk ita koko atu hahu iha 12 Janeiru maibe la konsege tanba ita presiza hetan dadus sira nomos buka ekipa jestaun ba merenda eskolar nia protidaun oinsa mak sira bele apoiu Autoridade Munisipiu Baukau ezekuta orsamentu ba merenda eskolar,” hateten Maria Celestina Viegas liu husi nia diskursu iha seremonia lansamentu programa merenda eskolar, neebe realiza iha eskola Ensinu Baziku Sentral Terseiru Siklu Vila Nova Baukau, Tersa (20/01/2026).
Tuir Sekretaria Munisipal Asuntu Sosial nee katak, loloos implementasaun programa merenda eskolar iha Munisipiu Baukau hahu iha loron 12 Janeiru 2026, maibe tarde no implementa iha loron 20 Janeiru 2026, tanba Autoridade Munisipal hamutuk ho Servisu Munisipal Edukasaun Baukau tarde hetan dadus estudante ba programa refere husi nivel eskola sira nomos tarde koordena Ekipa Jestaun Programa (EJP) atu ezekuta orsamentu ba programa refere.
Nia konsidera, implementasaun programa merenda eskolar iha Munisipiu Baukau ba anu letivu 2026 nian ho sedu, tanba Autoridade Munisipal hakarak alokasaun orsamentu ba programa refere fo duni benefisiu ba estudante benefisiariu sira iha nivel eskola.
“Merenda eskolar atu auguenta forsa oituan ba ita nia oan sira eskola iha Ensinu Baziku ho Pre-Eskolar nunee oan sira bele simu materia husi profesores sira ho diak durante oras sira iha eskola, tanba nee ohin ita lansa atu programa ida nee lao orsamentu husi Autoridade neebe koloka ba iha merenda eskolar bele tama fila fali oituan deit ba kofre estadu,” Maria Celestina Viegas akresenta.
Diretor Servisu Munisipal Edukasaun Baukau, Afonso dos Santos da Costa esplika, implementasaun programa merenda eskolar iha Munisipiu Baukau ba anu letivu 2026 nian hahu sedu, tanba alokasaun orsamentu fiskal tinan 2025 nian hamutuk rihun US$ 70 ba programa refere sei hela iha konta bankaria Ekipa Jestaun Programa (EJP) sira no sei devolve orsamentu rihun US$ 70 husi orsamentu anu fiskal 2026 ba kofre estadu tuir tempu determinadu.
“Orsamentu sira neebe iha saldo 2025 nian ida nee mak tempu fo fila fali kofre estadu nee seidauk too iha neeba, ami nia orsamentu anu fiskal 2026 mai ona i ami prepara ona pedidu no kontratu hatama ona, orsamentu neebe ami kalkula iha tempu ami fo fila fali entaun orsamentu sira neebe hela ami fahe ba EJP sira implementa iha dia 20 de Janeiru 2026 ohin,” Afonso informa.
Nia katak, benefisiariu ba programa merenda eskolar iha anu letivu 2026 husi Munisipiu Baukau ho total estudante liu rihun 34 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu ba loron efetividade 150, tuir planu estudante sira konsumu aihan husi programa merenda eskolar 25% produtu importadu no 75% produtu lokal.
“Ita la ajinti 75% kiik liu tanba ita bazeia ba produsaun sira iha terenu ami halo kalkulasaun kuaze 25% deit, ita esforsu nafatin ita nia sua exselensia Prezidente Autoridade mos esforsu para atu hamoris no motiva grupu agrikultores sira para oferese produtu lokal ba grupu fornesedor sira,” Afonso komenta.
Mezmu implementasaun programa merenda eskolar tinan 2026 hahu sedu, maibe Diretor Servisu Munisipal Edukasaun Baukau rekoinhese katak, implementasaun programa refere seidauk atinji tarjetu, tanba estudante benefisiariu sira kontinua konsumu produtu importadu ho 75%.
Maibe ba programa refere seidauk atinji tarjetu tuir mata dalan programa merenda eskolar nian, tanba kauza husi menus produsaun produtu lokal iha Baukau, nunee Autoridade Munisipiu Baukau esforsu ona liu husi motiva grupu agrikultores sira atu fornese produtu lokal ba programa refere iha nivel eskolar sira.
Entretantu implementasaun programa merenda eskolar iha Munisipiu Baukau ho valor orsamentu US$ 2,788,690 fo benefisiu ba estudante rihun 34.614 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu sira, no ninia implementasaun mantein ho regras tinan 2025 nian.
(tom)
