DILI, STLTIMORLESTE.com – Profesores no estudantes sira husi Eskola Baziku Filial (EBF) Fatumeta kada loron halo limpeza iha areador eskola nian.
Kestaun nee hatoo husi Koordenador Eskola Baziku Filiál (EBF) Fatumeta, Manuel Pires ba STL, Kinta nee (29/01/2026).
“Ami nian parte koordena ho saude diak tebes, iha programa ida atu husik susuk ida hamate susuk dengue ninia nee, iha ami nian eskola ami husu nafatin, too agora husi saude seidauk lori aimoruk mai rega, maibe sira husik deit mak susuk ida atu prevene moras dengue nian nee, too agora ami nian estudantes seidauk afeita ba moras ida nee, maibe karik ba oin mak iha, nee ami sei koopera ho saude bele mai rega ho aimoruk iha ami nian eskola,” nia dehan.
Manuel dehan, kada loron profesores no estudantes sira sempre halo limpeza iha areador eskola no sala aprendizajen idak-idak, dader molok halao aprendizajen halo uluk limpeza, nunee mos meudia antes halao aprendizajen, primeiru halo uluk limpeza, atu nunee bele Evita susuk iha eskola.
“Hau hanoin kona-ba limpeza ninia, loron ida limpeza dala rua, dader no meudia, ami husu ba estudantes sira oinsa atu tau lixu iha fatin, tanba limpeza nee importante tebes hodi prevene aan husi dengue, tanba moras ida nee liu husi susuk neebe tata, ami laos haruka estudantes deit mak halo limpeza, maibe hamutuk ho ami nian profesores sira mak halo limpeza loron ida halao dala rua,” nia esplika.
(jac)
