DÍLI, STLTIMORLESTE.com — Eskola Sekundária Jerál 10 de Dezembru, Comoro, simu ona konsesaun eskolár ne’ebé Ministériu Edukasaun (ME) atribui tuir númeru estudante ne’ebé ativu iha eskola. Osan ne’e sei uza atu suporta atividade eskolar, inklui ezame nasionál, ezame lokál, ezame tranzisaun klase, administrasaun no infraestrutura.
Diretór Eskola Sekundária Jerál 10 de Dezembru, Manuel Verdial, hato’o informasaun ne’e ba STL, Tersa-feira (13/10/2026).
Manuel esplika katak, konsesaun eskolár ne’ebé tama ona ba konta bankária eskola nian refere ba períodu fulan lima, ho númeru estudante ativu hamutuk 1.300. Ho baze ba númeru ne’e, eskola hetan alokasaun osan hamutuk US$ 7.054.
“Ha’u hanoin katak ami-nia konsesaun eskolár tama ona, maibé konsesaun ne’e bazeia ba númeru estudante ne’ebé ativu iha ami-nia eskola. Osan ne’e ba períodu fulan lima, no estudante tuir dadus ne’ebé ami iha hamutuk 1.300. Tanba ne’e, ami hetan osan US$7.054,” nia dehan.
Nia hatutan katak, osan ne’e sei uza ba nesesidade eskola nian, inklui preparasaun no ezekusaun ezame nasionál, ezame lokál no ezame tranzisaun klase, nune’e mos ba apoiu administrativu no hadi’a infraestrutura eskola.
“Konsesaun eskolár ne’e tama ona ba konta bankária eskola nian. Tanba ne’e, ami ezekuta osan tuir planu ne’ebé iha ona, no haree mos ba nesesidade infraestrutura, administrasaun no nesesidade seluk tan,” Manuel dehan.
Nia subliña katak, depois ezekuta konsesaun eskolár hotu, eskola sei prepara no submete relatóriu ba Ministériu Edukasaun. Relatóriu ne’e importante atu ministeriu bele avalia utilizasaun osan no konsidera atribuisaun konsesaun eskolár ba períodu tuirmai.
Iha parte seluk, diretór Eskola Sekundária Nobel da Paz, Jeremias P. de Jesus, informa katak to’o agora eskola ne’e seidauk simu konsesaun eskolár husi Ministériu Edukasaun, tanba sei iha problema eskola nian ne’ebé presiza rezolve uluk.
“Durante ne’e ami seidauk hetan osan ne’e. Bainhira ami rezolve problema eskola nian ho di’ak mak foin ami bele hetan osan ne’e,” nia informa.
Enkuantu ne’e, Gabinete Apoiu Tékniku (GAT) Eskola Ensinu Baziku Sentrál (EBC) Manleuana, Narciso Pinto Soares Vieira da Costa, konfirma katak konsesaun eskolár tama ona ba konta bankária eskola nian.
Nia dehan katak, eskola ne’e kontinua ezekuta osan tuir nesesidade, inklui apoiu ba ezame nasionál no ezame lokál.
“Agora dadaun konsesaun eskolár tama ona ba ami-nia konta bankária eskola nian. Tanba ne’e, ami ezekuta osan ne’e tuir nesesidade eskola nian,” Narciso dehan.
(jac)
