DÍLI, STLTIMORLESTE.com – Estudante hamutuk 1.935 iha Eskola Ensinu Baziku Central (EBC) Manleuana asesu ba Programa Merenda Eskolár, ne’ebé implementa tuir menu no oráriu ne’ebé eskola determina ona.
Gabineti Apoiu Tékniku (GAT) EBC Manleuana, Narciso Pinto Soares Vieira da Costa, hato’o informasaun ne’e ba STL, Tersa-feira (13/10/2026).
Nia hatete katak, implementasaun PME iha eskola ne’e lao di’ak hanesan baibain, tanba fornesedór sira prepara hahán tuir menu ne’ebé determina ona.
“Implementasaun programa merenda eskolár iha ami-nia eskola lao hanesan baibain, tanba fornesedór sira te’in tuir menu ne’ebé iha ona. Nune’e, kada loron estudante sira asesu ba programa ne’e ho di’ak. Total estudante hamutuk 1.935 mak asesu ba merenda eskolár,” nia haktuir.
Narciso afirma katak, menu merenda eskolár iha EBC Manleuana inklui etu, modo-tahan, naan-karau, ai-fuan no fore-mungu, ne’ebé prepara tuir menu ne’ebé eskola determina ona.
Iha parte seluk, Kordenadór Pré-Escolar Sagrada Família Vila-Verde, Cornélio António Soares, hatete katak implementasaun PME iha eskola ne’e mós lao di’ak, ho menu ne’ebé muda kada loron tuir planu.
Nia esplika katak, Segunda-feira estudante sira han etu; Tersa-feira sasoro kahur ho naan no modo; Kuarta-feira etu ho manu-tolun, moilu no tomati; Kinta-feira sasoro; no Sesta-feira fore-mungu ho susu-ben no gula-mera, ne’ebé kahur ho hudi-futuk tasak.
“Merenda eskolár iha ami-nia eskola lao di’ak hanesan baibain. Estudante sira asesu ba merenda kada loron, no menu prepara tuir planu ne’ebé iha,” nia dehan.
Cornélio hatete katak, Pré-Escolar Sagrada Família Vila-Verde iha fornesedór ida ne’ebé responsavel atu prepara merenda ba estudante hamutuk 109.
Nia mós esplika katak, eskola ne’e la uza ayam potong, sosis no ikan iha menu merenda eskolár, maibé uza naan-karau no manu-tolun hanesan fonte proteína ba estudante sira.
“Estudante hamutuk 109 mak asesu ba programa merenda eskolár. Ami hetan fornesedór ida. Ayam potong, sosis no ikan ami la uza. Ami uza naan-karau, no manu-tolun ami tau kahur ho moilu. Sosis la tama iha merenda eskolár,” nia haktuir.
Enkuantu, fornesedór merenda eskolár iha Pré-Escolar Sagrada Família Vila-Verde, Susan Reti, hatete katak nia prepara menu tuir nesesidade estudante sira, ho hahán hanesan etu, modo, naan-karau, sasoro, senoura, ai-fuan no manu-tolun.
Susan hatete katak, sira hahú prepara merenda hosi dadeer tuku 06.00, atu asegura hahán prontu ba estudante sira.
“Dadeer tuku neen ami sai husi uma mai atu te’in. Ami te’in etu ho modo no naan-karau. Dala ruma ami te’in sasoro kahur ho senoura no modo-tahan. Ai-fuan mós hanesan masan. Sosis, ikan no ayam potong la tama iha menu,” nia dehan.
Nia akresenta katak, merenda prepara dala ida de’it iha dadeer, maibé iha kuantidade boot tanba estudante sira tama eskola iha turnu dadeer no turnu meiudia.
(jac)
