BAUKAU, STLTIMORLESTE.com – Eskola Ensinu Baziku Filial (EBF) Primeiru Segundu Siklu iha Suku Buruma, Postu Administrativu Baukau Vila, Munisipiu Baukau, akumula estudante liu nain 60 iha sala ida hodi asesu prosesu aprendizajen.
Koordendor EBF Buruma, Henrique Freitas da Costa esplika, prosesu aprendizajem ba anu letivu iha EBF Buruma lao diak, tanba sala ba estudante sira sufisiente, maibe daudaun difikuldade neebe infrenta mak sala ida akumula estudante liu nain 60.
“Hansan iha primeiru anu nee iha 62 pesoas ami tau sala ida tanba difikuldade profesores,” hateten Henrique ba STL iha nia knaar fatin EBF Buruma, Sesta (30/01/2026).
Nia katak, hanesan estudante iha primeiru anu no iha klase seluk tan, loloos parte eskola labele akumula too nain 60 iha sala ida, maibe too nain 40 resin tuir estandar Ministeriu Edukasaun nian, tanba razaun menus profesores obrigadu tenke akumula estudante ho numeru barak iha sala ida.
Nia rekoinhese, akumulasaun estudante nain 60 resin iha sala ida difikulta estudante sira nia prosesu aprendizajem, tanba estudante nain 3 tuur iha meza ida labele asesu aprendizajem ho diak iha tempu eskola.
“Ami provizoriu tau hanesan nee depois ezame primeiru periodu iha profesor ruma ami bele fahe. Ami koordena ona ho Edukasaun Munisipal sei tau matan mai ami iha profesor kolokasaun ruma sira haruka mai mak ami bele fahe sala sira nee,” Henrique komenta.
Nia akresenta, profesores permanente neebe daudaun ativu hanorin iha EBF Buruma seidauk sufisiente, tanba la too nain 10 nunee parte eskola seidauk fahe estudante sira ba turnu 2, maibe aprezenta ona problema refere ba Servisu Munisipal Edukasaun Baukau bainhira iha profesores kolokadu husi Ministeriu Edukasaun ba eskola EBF Buruma mak parte eskola sei fahe estudante sira ba turnu 2.
Iha sorin seluk, Diretor Servisu Munisipal Edukasaun Baukau, Afonso dos Santos da Costa rekoinhese, eskola EBF Buruma sei menus profesores, tanba eskola refere kompostu husi Pre-Eskolar, Primeiru, Segundu no Terseiru Siklu, maibe profesores la too nain 10.
“Nain 9 nee sei menus, tanba primeiru segundu siklu nee mak prezisa profesores da turma, maibe terseiru siklu nee prezisa nain 11 ida mak nee entaun sira tenke 20,” Afonso hateten.
Tuir Diretor Servisu Munisipal nee katak, loloos parte eskola EBF Buruma fahe ba turnu 2, nunee bele fo vantajem ba estudante sira asesu prosesu aprendizajem, maibe razaun profesores la too Servisu Munisipal Edukasaun sei haree kestaun refere bainhira iha ona profesores kolokadu husi Nasional ba Munisipiu sira inklui Munisipiu Baukau.
Entretantu total estudante iha eskola EBF Buruma neebe hamutuk 517 kompostu pre-eskolar, primeiru, segundu no terseiru siklu.
(tom)
