DILI, STLTIMORLESTE.com – Ministeriu Saude (MS) liu husi Servisu Saude MunisÃpiu Dili (SSMD) no Diresaun Nasional Promosaun Saude, hamutuk ho estudante universitariu sira kontinua halao atividade promosaun saude tama sai uma iha suku no bairu sira iha Munisipiu Dili.
Tuir informasaun neebe STL sita husi pajina ofisial MS hatete, iha Sesta (30/01/2026) nee, SSMD no Diresaun Nasional Promosaun Saude, hamutuk ho estudante universitariu sira, kontinua halao atividade ida nee iha suku sira hanesan Suku Vila Verde, Santa Cruz no Lahane Oriental, ho objetivu atu fahe informasaun direta ba komunidade sira kona-ba prevensaun moras dengue no aumenta konsiensializasaun komunidade nian kona-ba importansia husi hamos fatin moris susuk dengue.
Alende ida nee, ekipa mos fahe kedan ai-moruk abate ba komunidade sira hodi uza iha tanki bee no fatin rai bee, atu prevene susuk dengue nia tolun no hamenus risku transmisaun moras dengue iha komunidade.
Durante atividade nee, Xefe do Suku Lahane Oriental, hamutuk ho ekipa husi Ministeriu da Saude, tun direta ba komunidade sira hodi fo avizu no orientasaun kona-ba dalan prevensaun moras dengue. Xefe suku mos konvida komunidade hotu atu hamutuk servisu no halo asaun kolektivu atu kombate moras dengue iha nia bairo no uma laran.
Ministeriu da Saude hein katak, ho partisipasaun ativa husi lideransa lokal no komunidade sira, bele habelar konsiensia no halo prevensaun moras dengue ho efetivu, hodi proteje saude publiku no moris diak ba ema hotu.
(dom)
