DILI, STLTIMORLESTE.com – Governu liu husi reuniaun Konselhu Ministru neebe lidera husi Primeiru Ministru (PM), Kay Rala Xanana Gusmão aprova ona projetu rezolusaun neebe aprezenta husi Ministru Interior (MI), Francisco da Costa Guterres, hodi suspende temporaria prosesu no revizaun ba Konkursu Publiku Admisaun iha Kursu Formasaun ba Ajentes Polisia Nasional Timor Leste (PNTL).
“Ho desizaun ida nee, Governu hakarak asegura transparensia, legalidade no kredibilidade iha prosesu rekrutamentu, hodi konsidera duvida no preokupasaun sira neebe hatoo husi kandidatu sira no entidade oin-oin kona-ba kumprimentu ba rekezitus balun no regularidade iha faze konkursu nian. Ba ida nee, Rezolusaun Governu prevee suspensaun temporaria ba konkursu no reforsa mekanizmu supervizaun no fiskalizasaun,” haktuir nota komunikadu neebe STL asesu husi media PCM, Kuarta (11/02/2026).
Desizaun nee mos determina atu halo re-estruturasaun ba Komisaun Monitorizasaun no Fiskalizasaun nian, liu husi integra membru nasional no internasional independente sira, nunee mos halo revizaun klean ba faze hotu-hotu husi prosesu selesaun nian, ho nia objetivu atu hatene lo-loos faktus no potensialmente adota medidas koretivas.
“Ho prosedimentu ida nee, Governu iha intensaun atu hametin sidadaun sira nia konfiansa iha instituisoins publikas no atu garante katak asesu ba Polisia Nasional Timor Leste nee halao ho justu, imparsial, no tuir lei,” sita komunikadu.
(alb)
