DILI, STLTIMORLESTE.com – Ohin loron krime Violensia Domestika (VD) kontinua akontese ho numeru neebe aas, tanba nee jurista konsidera katak VD laos bikan ho kanuru mak tarutu, maibe nee krime publiku.
“Presiza mos fo sensibilizasaun ba komunidade katak, VD nee krime publiku, ba sei deit hatene tenki hato keixa ba polisia para kaer mane neebe baku nia feen, tanba nee laos problema bikan ho kanura mak tarutu maibe nee krime, ho forma sira nee bele reduz krime VD iha futuru,” dehan Jurista Sergio Dias Quintas ba STL iha Kaikoli, Kuarta (11/02/2026).
Nia hatutan, krime VD kontinua akontese ho numeru aas, tanba feto maluk sira neebe sai vitima dala barak depende liu ba mane em termos ekonomia.
Nia dehan, governu tenki fo atensaun ba vida moris feto maluk sira, tanba wainhira problema vulnerabilidade nafatin iha feto nia kabas ka moris depende liu ba mane, problema violensia domestika sei kontinua sae.
Hatan kona-ba sentru juvenil, Sergio dehan, importante duni atu estabelese sentru juvenil.
“Hau nia hanoin importante para governu estabelese sentru juvenil atu asegura direitu minoridade sira nee, tanba wainhira minoridade mak pratika krime ruma sira labele kastigu hamutuk ho ema boot iha prizaun, maibe laos tanba razaun sira idade sei kiik husik deit sira livre nee lae.
Nia afirma, wainhira iha ona sentru juvenil sei akomula sira iha neeba hodi eduka sira, tanba nee sentru juvenil importante ba vida moris joven minoridade neebe pratika krime.
Iha sorin seluk, Akademiku UNTL, Rafael de Jesus dehan, se mak hasoru krime VD labele tauk hatoo keixa.
“Violensia domestika krime publiku, tanba nee se deit mak hasoru krime nee labele tauk hatoo keixa,” dehan nia.
Nia hatutan, liu husi hato’o keixa mak bele halo prevensaun iha futuru, tanba inan ida hasoru violensia kuandu hatoo keixa, Tribunal julga hasai desizaun, ida nee mos hanesan prevensaun iha futuru atu nia parseiru labele pratika tan aktu nee.
(ter)
