DILI, STLTIMORLESTE.com – Maski Governu liu husi Ministeriu Solidaridade Sosial no Inkluzaun (MSSI) kria ona kampanha sosial, realidade iha terenu hatudu katak numeru labarik neebe faan sasan iha dalan ninin kapital Dili kontinua sae fali iha fulan hirak ikus nee.
Iha observasaun neebe halao iha area Timor Plaza, Jardim Motael, Largo Lecidere no fatin seluk tan, Kinta nee (26/02/2026), haree labarik ho tinan 7 too 15 nain hira mak faan hela manutolu, krupuk, dosi no pulsa ba motorista sira neebe para iha lampu kor mean.
Tuir sasin nain husi labarik ida ho inisial J.X (10), nia tenki faan sasan tanba presiza ajuda ekonomia familia nian. ”Hau faan hodi ajuda inan-aman hodi sosa foos no modo, loron ida hau faan bele hetan osan dolar rua ka lima hanesan nee,” dehan J.X ba STL.
Iha parte seluk, Observador Politika, Daniel Mendonca preokupa ho seguransa no edukasaun labarik sira nee nian. Risku asidente trafiku no lakon tempu estuda nian sai kestaun prinsipal neebe presiza hetan asitente husi autoridade kompetente.
Too notisias nee STL hatun, parte Governu liu husi MSSI seidauk fo komentariu foun kona-ba planu foun atu foti labarik sira nee husi estrada, maibe antes nee sira deklara ona katak, kestaun nee presiza mos kooperasaun husi inan-aman sira atu labele obriga oan ba faan sasan.
(car)
