DILI, STLTIMORLESTE.com – Prezidente Republika (PR), Jose Ramos Horta halo brifing ho Primeiru Ministru (PM), Kay Rala Xanana Gusmão, ligadu ho problema neebe Padre Locateli relata ba Xefe Estadu durante nee.
Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kinta nee (05/03/2026) hatete, ohin halo enkontru ho Primeiru Ministru Kay Rala Xanana Gusmão hodi halo brifing kona-ba preokupasaun neebe Padre Locateli hatoo ba Xefe Estadu, liga ho preokupasaun komunidade nia inklui mos iha Fatumaka rasik.
“Hau nia enkontru semanal ho Primeiru Ministru hahu ho enkontru informal ida ho Amu Locateli neebe ita hotu hatene servisu diak tebes ba rai ida nee, ba povu kuaze semana semana Kuarta feira tuku 7 dader iha ona hau nia uma para koalia buat oin-oin, liu-liu ligadu ho problema kiak sira nia iha Baukau, Baguia, Laga, Seiçal, Fatumaka.
PR Horta dehan, fulan ruma liu ba Prezidente Republika husu Governu liu husi Primeiru Ministru Kay Rala Xanana Gusmão resposta kedas Governu tau osan sosa pecas para trator 16 ba Fatumaka, no tratador sira nee tinan 40 ona.
Primeiru Ministru autoriza kedas material sira nee iha dalan ona para rekupera trator sira nee hotu.
“Hau rasik tinan hira nia laran hasai orsamentu prezidensial nia tau 50 mil ka 100 mil, konforme uluk para ajuda komunidade iha neeba aluga trator Fatumaka nia atu sira fila nia rai, trator nee Prezidensia la ajuda karik tanba konbustivel karun trator nee han hemu konbustivel barak kada agrikultor selu US$ 20 kada oras ida para fila sira nia rai, ho ajuda prezidente fo nee agrikultor sira selu deit US$ 5, ida nee kmaan ba sira nee mak ajuda tinan sira nia laran dezde hau tama ba Prezidensia nee mak halo brifing ba Primeiru Ministru ohin iha nee,” dehan PR Horta.
Prezidente Republika hatutan, aleinde nee iha mos senhora ida iha Malazia haruka fertilazente lubuk ida mai 60 toneladas no Prezidente simu informasaun husi senhora nee katak nee diak kleur ona, no Prezidente rasik deside entrega ba Fatumaka.
“Hau hanoin buat nee 60 kilo maibe 50 toneladas, entau Amu Locateli hakfodak buat nee atu fahe halo nusa, tanba nee entrega fali ba Ministru Agrikultura mak haree, premeiru halo teste buat nee aplikavel ba Timor Fertilazente nee mai husi Amerika husi Malazia sira oferese gratuita, sira rasik mak selu transporte, nee mak ohin dadersan hamutuk ho Padre Locateli,” dehan PR Horta.
Prezidente Republika hatete, halo enkontru ho Primeiru Ministru Kay Rala Xanana Gusmão aprezenta mos progresu servisu Governu nia, no Primeiru Ministru Sabadu sei Aranka ba Suai, Bobonaro, Fronteira.
Xefe Estadu hatete, iha enkontru nee diskute mos asuntu seluk kona-ba Timor Leste nia preparasaun ba durante nia prezidensia CPLP no selebrasaun 30 anos CPLP.
(eme)
