DILI, STLTIMORLESTE.com – Prezidente Republika (PR), Jose Ramos Horta fo pose ba Sejuina Maria Fereira Gomes hodi asumi kargu nuudar Vise Ministra Negosiu Estranjeiru no Kooperasaun (MNEK).
Xefe Estadu Jose Ramos Horta prezide serimonia tomada de pose ba Vise.Ministra Negosiu Estranjeiru no Kooperasaun IX Governu Konstitusional, Jesuína Maria Ferreira Gomes, serimonia nee halao iha Palasiu Prezidensial Nicolau Lobato.
Prezidente Republika Nomeasaun Jesuína Gomes formaliza tuir Dekretu Prezidente Republika No.20/2026.
Bainhira Remata pose Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kinta nee (05/03/2026) hatete, ideia nee husi Prezidente ho Ministru MNEK nia kleur ona, tanba situasaun aktual servisu Ministru MNEK nia todan tebes.
“Ezijensia laos deit atu ASEAN ita nia relasaun bilateral ho rai lubuk ida iha ASEAN no iha Eropa, Afrika, Amerika Latin, senhor Ministru viajen beibeik laiha tempu para tau matan ba jestaun ministeriu nia, Vise Ministra Milena Rangel tau matan ba ASEAN nee duni kleur ona mak Primeiru Ministru buka elementu ida kaer Vise MNEK iha parte internu, depois sira temi Doutora Sejuina Maria Fereira Gomes no hau konkorda kedas,” dehan PR Horta.
PR Horta dehan, ho Vise MNEK nia nee bele haree took halo MNEK moderniza profesionaliza diak liu tan.
Iha tinan hira nia laran ministeriu halo buat neebe bele servisu diak, no balun iha MNEK 20 anos ona iha esperiensia sira konsege kaer ministeriu, maibe agora Timor tama ASEAN atividade ho situasaun mundial nee barak tebes, tenke aumenta liu tan apoiu rekursu umanu MNEK nia.
Jesuína Maria Ferreira Gomes lori esperiensia barak ba knaar ida nee, foin lalais nee nia servisu nuudar Xefe Kaza Sivil Prezidensia Republika nian, pozisaun ida neebe nia hetan nomeasaun husi Prezidente Jose Ramos Horta iha loron 11 fulan Julhu tinan 2023. Nia iha Mestradu iha Administrasaun Publika husi Universidade Hawaii at Manoa Estadus Unidus Amerika. Ninia kareira distintu iha funsaun publika inklui servisu nuudar Provedoria ba Direitus Umanus no Justisa (PDHJ) hahu husi loron 7 Novembru tinan 2018, too loron 5 fulan Janeiru tinan 2023.
Antes nee, nia sai nuudar Adjunta Provedoria ba Boa-Governasaun iha PDHJ husi fulan Janeiru 2014 too loron 15 fulan Novembru 2018. Husi tinan 2009 too 2014, nia halao knaar nuudar Komisaria ba Komisaun Funsaun Publika, neebe foka liu ba formasaun no dezenvolvimentu, no mos servisu nuudar formadora iha Institutu Nasional Administrasaun Publika (INAP). Ninia esperiensia extensivu iha setor publiku inklui mos mandatu badak ida nuudar Inspetora Jeral Ministeriu Administrasaun Estatal no Ordenamentu Territorial (Julhu-Setembru 2009). Uluk iha ninia kareira, nia servisu hamutuk ho organizasaun internasional oin-oin hanesan Peace Corps, USAID no AUSAID, no nuudar dosente iha Fakuldade Siensia Sosial Universidade Nasional Timor Leste (UNTL). Nia hahu nia perkursu profisional iha administrasaun publika iha tinan 1994, servisu iha kapasidade oin-oin inklui Sekretaria Xefe iha Administrasaun Suku Atabae, Munisípiu Bobonaro (1995-1997). Nuudar rekonhesimentu ba nia kontribuisaun signifikativu sira ba administrasaun publika, governasaun diak, direitus umanus no dezenvolvimentu institusional, Sra. Jesuína Gomes simu kondekorasaun Kolar Orden Timor Leste nian iha loron 28 fulan Novembru tinan 2023.
Prezidente Ramos Horta afirma Jesuína Maria Ferreira Gomes nuudar servidor publiku ho integridade boot no kompetensia komprovadu. Ninia esperiensia klean iha governasaun, direitus umanus no kooperasaun internasional sei sai importante tebes bainhira kontinua hametin Timor Leste nia parseria sira iha rai liur no avansa interese nasional sira iha palku global.
PR Horta fiar katak nia sei serví nasaun ho distinsaun iha ninia papel foun. “Servisu besik nuudar hau nia Xefe Gabinete, hau asiste rasik ninia dedikasaun no etika servisu. Nia iha kapasidade kombinasaun perfeita husi perísia teknika no kompromisu klean ba ita nia povu, neebe halo nia sai kualifikadu tebes ba karteira importante ida-nee,” dehan Horta.
Prezidente dezeja Jesuína Maria Ferreira Gomes, susesu boot iha ninia funsaun foun sira, serví povu no interese Republika Demokratika Timor Leste nian.
Aleinde nee Vise Ministra MNEK, Jesuína Maria Ferreira Gomes liu husi juramentu jura ba Maromak katak, sei halao knaar tuir lei neebe vigora.
(eme)
