DILI, STLTIMORLESTE.com – Rekrutamentu ba profisionál saúde iha Hospital Nasionál Guido Valadares (HNGV) la garante funsionáriu kontratadu no voluntáriu sira hetan vaga, tanba prosesu ne’e konkursu públiku.
Prezidente Komisaun Rekrutamentu Kandidatu Profisionál Saúde HNGV, Vidal de Jesus Lopes hato’o informasaun ne’e ba jornalista sira iha Bidau, Tersa-feira (13/10/2026).
Nia hatete katak, prosesu rekrutamentu agora tama ona iha faze publikasaun rezultadu selesaun dokumentu, tuir prosedimentu konkursu públiku ne’ebé aplika ba kandidatu hotu.
Tuir Vidal, aplikante hamutuk 8.840, admitidu 4.547, no la admitidu 3.432. Númeru hirak-ne’e seidauk hanesan total aplikante, tanba presiza verifika dadus.
Nia esplika katak, kandidatu ne’ebé la admitidu iha direitu atu hato’o reklamasaun durante loron lima, hahú hosi loron 12 to’o Sesta-feira.
Vidal hatete katak, kritériu selesaun tuir prosedimentu ne’ebé eziste, no kandidatu tenke hetan pontu 60 ka liu atu pasa; pontu 58 sei rezulta eliminasaun.
“Ne’e la garante katak voluntáriu ka kontratadu iha ne’e mak sei liu. Tanba ida-ne’e konkursu públiku, la’ós konkursu interna,” nia hatete.
Nia relata katak, durante períodu reklamasaun, kandidatu na’in 500 resin mak hatama ona reklamasaun kona-ba rezultadu selesaun dokumentu.
“Depois ita sei haree ida-idak hodi fó resposta. Se dokumentu kompletu, ita sei konsidera; maibé se la loos, ita sei informa razaun,” nia esplika.
Vidal hatete katak, Komisaun Rekrutamentu sei analiza reklamasaun ida-idak, hodi verifika dokumentu no determina se kandidatu bele hetan konsiderasaun fali.
Tuir kalendáriu inisiál, teste eskrita sei hahú iha 26 Outubru 2026 no kontinua to’o loron 30 fulan ne’e.
Maibé, Komisaun Rekrutamentu halo enkontru no deside estende períodu teste durante loron rua tan, depois de Finadu, tanba kandidatu admitidu barak.
Nia esplika katak, Komisaun Funsaun Públika bele hala’o teste ba kandidatu na’in 720 de’it kada loron, nune’e presiza ajusta kalendáriu atu kandidatu hotu bele halo teste.
Vidal afirma katak, aplikante balun la pasa selesaun dokumentu tanba dokumentu la kompletu, no balun seluk hatama aplikasaun rua ba vaga hanesan.
“Ema ida ho númeru referénsia ida aplika dala rua; ema na’in haat ka lima mak halo hanesan ne’e,” nia hatete.
Bainhira husu kona-ba transparénsia, Vidal afirma katak HNGV garante transparénsia iha prosesu rekrutamentu, hosi selesaun dokumentu to’o teste eskrita no entrevista.
Nia hatete katak, prosesu tomak sei hala’o iha koordenasaun ho Komisaun Funsaun Públika, tuir prosedimentu rekrutamentu ne’ebé aplika.
(dom)
