DILI, STLTIMORLESTE.com – Jornalista nain 10 neebe fasilita husi Ministeriu Ensinu Superior Siensia no Kultura (MESSK) kolabora ho Sekretariu Estadu Komunikasaun sosial halao estudu iha Universidade Nasional Timor Lorosae (UNTL), propinas sei selu husi MSSK.
Lia hirak nee hatoo husi Sekretariu Estadu Komunikasaun Sosial, Expedito Dias Ximenes ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (06/03/2026).
Sekretariu Estadu hatete, lista neebe husi Ministeriu Ensinu Superior Siensia no Kultura neebe haruka ba iha Sekretariu Estadu Komunikasaun Sosial nain 10, no daudaun nee naran sira nee haruka ona ba UNTL hodi tuir prosesu aprendizajen, maibe kona-ba propinas MESSK mak sei selu.
“Depois konsulta ho MESSK, kolega jornalista nain 10 neebe lista haruka mai iha Sekretariu Estadu Komunikasaun Sosial sira nee haruka ona ba UNTL, sira bele hahu eskola maibe sira nia propinas nee UNTL hanesan estadu nia sira bele tama lai depois mak Ministeriu Ensinu Superior mak sei haree fila fali mak selu sira nia propinas, laos ba selu kedas lae, ensinu superior sei koalia ho reitor UNTL katak jornalista sira nee ba tuir aula lai depois ministériu mak sei haree ba sira nia propinas,” dehan nia.
Ida nee servisu hamutuk entre Sekretariu Estadu Komunikasaun Sosial ho Ministeriu Ensinu superior Siensia no Kultura.
Tanba nee SEKOMS husu jornalista prontu atu ba eskola bele tama daudaun ona, eskola propinas depois mak Governu liu husi MESSK ho SEKOMS sei haree.
“Se kolega sira prontu ona atu ba tuir aula bele tuir, kona-ba propinas ensinu superior mak sei haree ida nee, koordenasaun ho reitor Universidade UNTL,” katak SEKOMS.
Nia hatete, programa nee husi MESSK, maibe tanba relasaun ho jornalista no media, tanba nee MESSK husu SEKOMS nunee prepara jornalista nain 10 no sira neebe senior.
“Iha kriteria, no jornalista neebe atu halao estudu nee tenke halao servisu tinan 5, nia tama kategoria senior, ida nee mak kriteria neebe mak SEKOMS fo sai husi media 10 mak hatoo ona no prosesu nee too ona UNTL, se sira hakarak tama ona laiha problema, konaba propinas depois Ministru Ensinu superior sei koalia ho reitor Universidade,” katak nia.
Jornalista nain 10 neebe hetan halao estudu iha Universidade Nasional Timor Lorosae husi media privadu no Estatal neebe eziste iha Timor Leste no jornalista nain 10 apoiu husi Governu liu husi Ministeriu Ensinu Superior Siensia no Kultura halo kolaborasaun ho Sekretariu Estadu Komunikasaun sosial hodi fasilita jornalista sira halao estudu iha area komunikasaun sosial iha UNTL no propinas nee sei selu husi Governu liu husi MESSK.
Aleinde nee oinsa ho Programa Youtuber, hatan ba kestaun nee Sekretariu Estadu hatete, programa nee laos husi SEKOMS nia maibe SEKOMS servisu hamutuk ho Ministeriu Transporte Komunikasaun, prosesu diskusaun husi SEKOMS no Ministru Transporte mos halo ho Google, Meta, Youtube iha Singapura, Jakarta no prosesu nee lao hela.
No iha prinsipal rua atu bele hetan ida nee mak tenke iha internet neebe velosidade lais, segundu mak halo literasia ho komunidade ba joven sira.
(eme)
