AINARO, STLTIMORLESTE.com – Primeiru Ministru (PM), Kay Rala Xanana Gusmão ofisialmente entrega hand traktor hamutuk unidade 10 husi Ministeriu Agrikultura, Pekuaria Peskas no Floresta (MAPPF) ba grupu agrikultura sira iha Munisipiu Ainaro.
Hafoin remata vizita ofisial Primeiru Ministru nian hamutuk ho membru Governu iha Munisipiu Manufahi, loron Segunda (08/03/2026) kontinua kedas iha Munisipiu Ainaro hodi ofiasializa internet livre iha jardim Ainaro Vila no kuda ai fo fuan rambutan inklui entrega direita hand traktor unidade 10 ba grupu agrikultura sira.
Diretora Servisu Munisipal Agrikultura Ainaro, Aguida Judit Mendonça esplika, husi hand traktor unidade 10 neebe entrega direita husi Primeiru Ministru Kay Rala Xanana Gusmão ba grupu agrikultores 7 neebe involve husi ema nain 15 too 20.
Grupu 7 refere Servisu Munisipal Agrikultura Ainaro identifikadu iha Suku Manu Tasi, Uma Ulo, Kasa, Bonuk no Suku seluk tan neebe mak sai tarjetu ba produsaun agrikola iha Munisipiu Ainaro.
“Hand traktor nee ita fasilita ba sira atu hali natar, tanba agora tempu halai natar sira prezisa tebes entaun oinsa mak ajuda tan ita nia agrikultores sira prepara rai didiak hodi nunee sira bele kuda hare,” Diretora Servisu Munisipal Agrikultura Ainaro, Aguida Judit Mendonça ba jornalista sira iha Jardim Ainaro Vila, Segunda (09/03/2026).
Nia sublina, apoiu refere mak nuudar meuis ida husi Governu liu husi MAPPF objetivu atu krese numeru produsaun iha rai laran liu liu iha Munisipiu Ainaro hodi garante ba stock aihan, tanba durante tinan naruk Timor-Leste ukun aan maioria komunidade agrikultores sira utiliza sistema manual hodi pratika iha setor produtividade neebe afeta ba Timor Leste menus numeru produsaun.
Maibe liu husi apoiu refere Diretora Servisu Munisipal Agrikultura Ainaro nee garante, sei aumenta numeru produsaun no ajuda komunidade agrikultor sira nia moris iha Munisipiu Ainaro, tanba liu husi apoiu refere bele reduz ona servisu todan sira neebe durante nee infrenta iha pratika servisu agrikultura nian iha baze liu liu apoiu fila rai ba.
“Apoiu ida nee bele fasilitas tan sira badinas liu tan no hamenus sira nia servisu todan neebe sira hasoru iha terrenu,” Aguida fundamenta.
Iha fatin hanesan benefisiariu husi grupu Veteranus Haburas Fomento, Bendito Flori Barro Salom sente kontente no orgulhu ba apoiu refere, tanba durante servisu iha natar laran seidauk hetan apoiu ekipamentus modernu ba setor agrikultura nian, neebe dutante nee difikulta tebes servisu liu liu fila rai iha natar, maibe liu husi apoiu refere bele hakman ona servisu.
“Durante nee ami nuunka hetan maibe agora fasilita ona ami hatutan ona ami nia liman ain bele servisu lalais, maibe ajuda ida nee seidauk total, tanba ita hetan ida, tanba husi ami nia grupu iha natar hektare 21, tanba nee la sufisiente ba ami atu kobre natar hektare 21 ida nee,” Bendito espresa.
Komunidade agrikultor nee husu Ministeriu Agrikultura Pekuaria Peskas no Floresta atu nafatin fo apoiu traktor ba grupu agrikultura sira hodi fila rai natar neebe daudaun funsiona iha Munisipiu Ainaro hamutuk hektare 980.
Entretantu Partisipa iha serimonia nee Ministru Administrasaun Estatal, Tomás do Rosário Cabral, Ministru Planeamentu no Investimentu Estratejiku, Gastão Francisco de Sousa, Ministra Saude, Elia dos Reis Amaral, Ministru Agrikultura, Pekuaria, Peskas no Floretas, Marcos da Cruz, no Sekretariu Estadu Komunikasaun Sosial Expedito Dias Ximenes.
(tom)
