DILI, STLTIMORLESTE.com – Ministeriu Edukasaun (ME) husu ba inan aman labele moe ho kondisaun oan defisiensia, maibe tenke lori sira ba eskola.
Tuir Diretor Nasional Edukasaun Inkluzivu Asaun Sosial Eskolar, Fernando Soares dehan, husu ba inan aman sira neebe oan ho kondisaun defisiensia labele moe ho oan ninia kondisaun, lori sira ba iha eskola atu nunee bele atinji sira nian futuru ida neebe mak diak, nee duni husu inan aman sira lori oan defisiensia ba iha eskola, labele husik iha uma deit, maibe tenke haruka sira asesu ba iha edukasaun.
“Oan sira defisiensia balun la asesu edukasaun, nee dala ruma inan aman balun moe atu lori sira nia oan ba iha eskola, maibe husu para inan aman sira, oinsa mak lori oan sira asesu ba iha eskola, atu nunee futuru labarik sira nian nee diak liu atu dezenvolve rai ida nee, tanba dala ruma labarik defisiensia sira mos iha direitu asesu ba eduksaun,” dehan Fernando ba STL iha nia knaar fatin, Sesta nee (29/05/2026).
Nunee mos Xefe Suku Comoro, Eligio Jose da Silva Marcal dehan, autoridade lokal sempre fo hanoin ba inan aman neebe iha oan defisiensia labele taka dalan ba sira atu asesu ba iha edukasaun formal no non formal.
“Hau hakarak apela ba inan aman neebe sira nian oan defisiensia iha suku Comoro katak, karik iha oan ou alin sira neebe mak ho kondisaun defisiensia karik, husu inan aman sira atu labele taka dalan ba sira asesu ba iha edukasaun, tanba sira iha direitu atu aprende buat ruma iha eskola hanesan ho sira nian maluk sira seluk,” nia informa.
Nia dehan, husu inan aman sira oinsa mak atu motiva oan sira neebe ho kondisaun defisiensia bele asesu ba iha edukasaun, fo tempu ba sira atu bele hetan edukasaun, nee duni família tenke motiva nafatin sira nian oan defisiensia sira, atu nunee bele asesu ba iha edukasaun.
Iha fatin seluk, Odete Nunes da Costa Marques hanesan inan neebe oan defisiensia hatete, ninia oan agora daudaun remata ona estudu nivel sekundariu, maibe atu haruka nia kontinua ba iha ensinu superior, maibe sei haree ba orsamentu no agora daudaun lori nia atu ba tuir kursu lian inglês no komputador, tanba edukasaun non formal mos importante tebes, nee duni nuudar inan aman sempre fo apoiu tomak ba oan nian estudu, maske oan ho kondisaun defisiensia, labele lakon oportunidade hanesan ho ninia maluk sira seluk.
(jac)
