DILI, STLTIMORLESTE.com – Tribunal Judisial Primeira Instansia Dili (TJPID) halao prosesu Primeiru Interogatoriu ba kazu deskonfia oho vitima Constancio Saldanha Bere, iha area Kuluhun Bekora.
Arguidu nain tolu (3) lori mai iha Tribunal ho inisial, ASP, JPX no CSP, bazeia ba NUC. 0174.26/DIBCR. No Ministeriu Publiku promove ho krime rua, krime omisidiu simples neebe previstu iha artigu 138 husi Kodigu Penal Timor Leste no krime Arma branka iha lei Numeru 5/2017.
Iha Tribunal, Juiza turnu halo tiha identifikasaun no rona arguidu nain tolu nia deklarasaun, Tribunal kontinua husu atu tama ba alegasaun Ministeriu Publiku no parte defeza nia.
Iha alegasaun Ministeriu Publiku reprezenta Prokurador Pedro Baptista, husu Tribunal atu aplika medida koasaun Prizaun Preventiva ba arguidu nain tolu, tanba konsidera arguidu sira nia hahalok mak vitima tenke lakon vida.
Enkuantu, parte Defeza husu ba Tribunal atu foti despaxu tuir Tribunal nia konviksaun neebe mak iha, tanba arguidu sira konfesa katak, sira la envolve iha problema no la iha konhesimentu ba matebian nia mate.
Advogadu privadu, Americo Martins hateten, durante prosesu Primeiru Interogatoriu lao, arguidu sira deklara katak, arguidu sira la iha konhesimentu saida mak akontese ba vitima too vitima lakon vida.
Nia hatutan, iha alegasaun Ministeriu Publiku nia husu Tribunal atu aplika medida koasaun Prizaun Preventiva ba arguidu nain tolu. No defeza iha nia alegasaun rekomenda ba Tribunal atu deside tuir konhesimentu Tribunal nia, liga tentativa omisidiu, maibe tuir versaun arguidu sira nia katak, sira la iha konhesimentu no la envolve, tanba nee mak entrega deit ba Tribunal mak deside.
Defeza esplika, kona-ba vitima nia mate nee, arguidu sira la iha konhesimentu no kona-ba kazu disputa rai nee arguidu sira konfesa katak, antes nee iha duni problema.
Nia dehan, versaun seluk mak sira la iha konhesimentu ba problema nee, no sira konfesa katak antes nee sira problema ho rai, maibe liga ho prosesu ida nee, sira la iha konhesimentu no sira mos la ba iha neeba, tanba nee mak sei iha prosesu investigasaun nia laran husi Ministeriu Publiku mak halao nia servisu.
Hafoin rona tiha alegasaun, Tribunal deside muda ba loron Segunda oras tuku 9:30 hodi rona despaxu.
Prosesu primeiru interogatoriu nee prezide husi Juiza turnu Jumiati Freitas, Ministeriu Publiku reprezenta husi Prokurador Pedro Baptista no arguidu nain tolu hetan asistensia legal husi Advogadu Privadu, Americo Martins.
(ter)
