BAUCAU, STLTIMORLESTE.com – Autoridade Protesaun Sivil (APC) Munisípiu Baucau afirma katak ekipamentu no rekursu transporte limitadu sai obstákulu ba ekipa Bombeiru atu kombate inséndiu iha Foho Matebian, Suku Abo, Postu Administrativu Matebian, Munisípiu Baucau.
Komandante Operasaun APC Munisípiu Baucau, Francisco Viana Freitas, hato’o katak bainhira simu informasaun kona-ba inséndiu ne’e, ekipa Bombeiru diretamente sai ba fatin akontesimentu atu halo prevensaun no asegura komunidade ne’ebé hela iha área refere.
Maibé, tanba distánsia dook, dalan la asesível ba kareta no ekipamentu limitadu, ekipa Bombeiru la konsege to’o iha foho leten ne’ebé ahi lakan hela.
Nia esplika katak, APC iha kareta rua, inklui kareta autotanke ida, maibé la sufisiente atu responde ba inséndiu ne’e, tanba laiha dalan ba kareta rua refere atu to’o iha foho leten.
“Ekipa ami to’o iha fatin ne’e atu halo prevensaun no asegura uma sira iha foho lolon, maibé ami la konsege sae ba foho leten tanba dalan la iha no ekipamentu mós limitadu,” Francisco hateten ba jornalista sira iha Tirilolo Baucau, Sesta (06/11/2026).
Nia hatutan katak, inséndiu iha Foho Matebian bele mosu tanba kauza oioin, inklui atividade ema nian hanesan sunu to’os, soe sigaru ka ahi ne’ebé ema husik hela iha foho lolon. Maibé, APC seidauk iha informasaun konfirmada kona-ba kauza inséndiu ne’e.
Nia dehan katak, APC nafatin halo monitorizasaun no koordenasaun ho instituisaun relevante husi setór Leste, atu fó apoiu bainhira inséndiu ne’e alastra makaas sei presiza sira nia tulun.
Iha parte seluk, APC mós halo apelu ba komunidade atu evita sunu rai arbiru durante tempu bailoro naruk, tanba bele estraga ambiente, ai-hun sira ne’ebé ajuda rai rai-been no fonte bee naturál.
(tom)
