DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Prizaun Preventiva ba arguidu nain rua (2), kona-ba kazu Kuluhun neebe rezulta vitima Constansio Saldanha Bere lakon vida.
Iha despaisu ikus nee, Tribunal deside aplika medida Prizaun Preventiva ba arguidu nain rua ho inisial ASP no JPX.
No arguidu ho inisial CSP hetan medida Aprezentasaun Periodika, semana ida dala ida iha Eskuadra Polisia neebe hela besik ba.
Hafoin desizaun, Defeza arguidu sira nian deklaa, nia parte la konkorda desizaun Tribunal, sei halo rekursu.
“Hau sei koalia ho familia sira hodi halo rekursu, tanba la konkorda ho desizaun Tribunal nian,” dehan Defeza Americo Martins iha Tribunal Dili, Segunda nee.
Arguidu nain tolu lori mai iha Tribunal ho inisial ASP, JPX no CSP, bazeia ba NUC. 0174.26/DIBCR. No Ministeriu Publiku promove ho krime rua, krime omisidiu simples neebe previstu iha artigu 138 husi Kodigu Penal Timor Leste, no krime arma branka iha lei Numeru 5/2017.
Antes nee iha alegasaun Ministeriu Publiku reprezenta Prokurador Pedro Baptista, husu Tribunal atu aplika medida koasaun Prizaun Preventiva ba arguidu nain tolu, tanba konsidera arguidu sira nia hahalok mak vitima tenke lakon vida.
Enkuantu, parte Defeza husu ba Tribunal atu foti despaxu tuir Tribunal nia konviksaun neebe mak iha, tanba arguidu sira konfesa katak, sira la envolve iha problema no la iha konhesimentu ba matebian nia mate.
Advogadu privadu, Americo Martins hateten, durante prosesu Primeiru Interogatoriu lao, arguidu sira deklara katak, arguidu sira la iha konhesimentu saida mak akontese ba vitima too vitima lakon vida.
Nia hatutan, iha alegasaun Ministeriu Publiku nia husu Tribunal atu aplika medida koasaun Prizaun Preventiva ba arguidu nain tolu. No defeza iha nia alegasaun rekomenda ba Tribunal atu deside tuir konhesimentu Tribunal nian, liga tentativa omisidiu, maibe tuir versaun arguidu sira nia katak, sira la iha konhesimentu no la envolve, tanba nee mak entrega deit ba Tribunal mak deside.
Defeza esplika, kona-ba vitima nia mate nee arguidu sira la iha konhesimentu no konaba kazu disputa rai nee arguidu sira konfesa katak, antes nee iha duni problema.
Nia dehan, versaun seluk mak sira la iha konhesimentu ba problema nee, no sira konfesa katak antes nee sira problema ho rai, maibe liga ho prosesu ida nee sira la iha konesimentu no sira mos la ba iha neeba, tanba nee mak sei iha prosesu investigasaun nia laran husi Ministeriu Publiku mak halao nia servisu.
Prosesu primeiru interogatoriu nee prezide husi Juiza turnu Jumiati Freitas, Ministeriu Publiku reprezenta husi Prokurador Pedro Baptista, no arguidu nain tolu hetan asistensia legal husi Advogadu Privadu, Americo Martins.
(ter)
