DILI, STLTIMORLESTE.com – Eskola Sekundáriu Jeral (ESJ) 10 de Dezembro Comoro too agora seidauk iha profesores ba disiplina lingua português.
Haktuir Manuel Verdial, nudar Diretor Eskola Sekundariu Jeral 10 de Dezembro Comoro ba STL iha nia knaar fatin, Segunda nee (01/06/2026).
“Hau seidauk halo karta legal, maibe ho hau nian aproximasaun informal ba iha diresaun edukasaun nasional ensinu sekundariu jeral, liu-liu profesores neebe hanorin lingua português nee ami falta tebes, tanba profesores nain rua tama reforma obrigatoriu, nee duni fatin ba profesores nain rua nee mak mamuk total,” nia esplika.
Nia dehan, se ida nee mak agora la hetan, sira sei buka meus oinsa bele haree labarik sira estajiadu haree ba sira nian kapasidade, sira bele ajuda disiplina ida nee, hodi bele asegura daudaun aula nee, hodi hein bolsa kandidatu ba lingua português daudaun nee sei mamuk hela.
“Ba disiplina ida nee fatin sei mamuk, oinsa mak ho rekrutamentu bolsa kandidatu ninia nee bele tau fali profesores nain rua ba disiplina português ninia, ita labele haree fatin nee ninia karga orariu nee labele mamuk, maibe durante nee ami fahe profesores sira balun hanorin too 30 oras, balun 34,” katak nia.
Iha fatin seluk, Diretor Servisu Edukasaun Munisípiu Ainaro, Patricio da Costa Magno hatete, Eskola Sekundáriu Jeral (ESJ) no Ensinu Baziku Central (EBC) hamutuk 20 iha Munisípiu Ainaro sei menus rekursu umanu.
“Konaba rekursu hanesan profesor, ita nian eskola balun sufisiente ona, maibe eskola ida rua nunee seidauk, no ita koko atu rezolve bazeia ba quadro pesoal neebe mak agora iha hela nee. Hau hanoin iha Munisípiu Ainaro nee kuaze ita nian eskola 20 mak sei menus rekursu, ita presiza aumenta ida rua nunee, ita nian ensinu sekundariu mos balun sei menus,” nia dehan.
Nia dehan, ensinu sekundariu nee koloka ona bolsa kandidatu maibe seidauk kompletu, liga ba siensia sosiais ninia nee presiza tan rekursu umanu,ensinu baziku nee iha 93, eskola cafe 94, pre eskolar 46.
“Nivel ensinu baziku no nibel sekundariu, ita nian nibel rua nee mak sei menus rekursu umanu, sekundariu nee liga ba iha siensia sosiais ninia, ensinu baziku nee ita sei menus rekursu ba lingua portuguêsa,” katak nia.
Nia akresenta, nuudar Diretor Edukasaun Munisípiu Ainaro halo ona lista iha kada eskola neebe sei menus rekursu nee, hatoo ona ba edukasaun, depois sei haree ba iha quadro pesoal neebe mak iha ona.
(jac)
