DILI, STLTIMORLESTE.com – Eskola Sekundáriu Jeral (ESJ) 10 de Dezembro Comoro ezekuta ona konsesaun eskolar 90%, bainhira remata ezekusaun sira sei submete relatoriu ba Ministeriu Edukasaun.
“Ami nian konsesaun eskolar daudaun nee ami ezekuta ona, asuntu ida kona-ba manual konsesaun, nee infraestrutura bazika neebe mak sai prioridade, ita kuandu presiza simu bainaka barak, maibe fatin ida laiha, ho agora nee ema bele haree infraestrutura ida neebe mak edukasaun ema atu sai ema neebe preparadu,” dehan Diretor Eskola Sekundariu Jeral 10 de Dezembro Comoro ba STL iha nia knaar fatin, Segunda nee (01/06/2026).
Nia dehan, asuntu administrasaun bele lao ho diak, nunee mos atende públiku no estudantes sira ho diak, nee duni presiza sala administrativa, biblioteka tenke diak, agora daudaun atu instala bee ba haris fatin sira nee ho diak, asuntu sira prioridade liu mak ba ida nee.
“Ninia ezekusaun konsesaun nee ba fulan neen ninia, bainhira ami ezekuta hotu ona mak ami sei submete fali relatóriu ba Ministeriu Edukasaun liu husi Edukasaun Munisipiu Dili, tanba ita ezekuta hotu, halo relatóriu mos importante,” dehan nia.
Nunee mos Diretor Eskola Sekundariu Jeral FINANTIL, Aniceto Berlelo dehan, Eskola Sekundáriu Jeral (ESJ) FINANTIL prepara ona relatóriu konsesaun eskolar, hodi bele submete ba iha Ministériu Edukasaun.
“Kona-ba konsesaun eskolar nee ami simu tiha ona dezde iha ezame primeiru periodu ninia, no agora daudaun ami prepara fali relatóriu konsesaun eskolar nian nee, atu bele submete ba Ministeriu Edukasaun, tanba konsesaun eskolar nee husi parte eskola ezekuta hotu ona, agora ezekuta ba saida deit, nee husi GAT mak hatene liu,” nia esplika.
Aniceto hatutan, konsesaun eskolar nee kada estudantes ida US$ 2, nunee daudaun nee eskola prepara ona relatóriu para bele hatama ona, konsesaun nee bainhira eskola sira ezekuta hotu ona mak eskola sira tenke halo fali relatóriu ba Ministeriu Edukasaun.
Iha fatin seluk, Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes antes nee dehan, Ministériu Edukasaun atribui ona konsesaun eskolar ba ensinu sekundariu jeral públiku hamutuk 77, maibe husu eskola keta haluha halo fali relatóriu mai ME.
(jac)
