DILI, STLTIMORLESTE.com – Servisu Edukasaun Munisipiu Bobonaro halo linha koordenasaun servisu nian ho parte dirijente husi eskola ida-idak.
Diretor Servisu Edukasaun Munisípiu Bobonaro, Miguel Freitas katak, durante nee husi parte Edukasaun Munisipiu Bobonaro nafatin halo linha koordenasaun servisu neebe diak ho direjente husi eskola sira, bainhira iha informasaun ruma sira sempre pasa ba malu liu husi enkontru no via telefone.
“Nuudar Diretor Edukasaun Bobonaro, durante sempre iha linha koordenasaun servisu ho ita nian direjente eskola sira, atu nunee bainhira eskola sira infrenta problema ruma, nee tenke fo informasaun ba malu,” dehan Miguel ba STL liu husi telefone, Segunda nee (01/06/2026).
Iha fatin seluk, Patricio da Costa Magno hanesan Diretor Servisu Edukasaun Munisipiu Ainaro dehan, Servisu Edukasaun Munisipiu Ainaro nafatin halo koordenasaun servisu ho lideransa eskola hanesan Diretor Eskola sira importante tebe-tebes.
“Nuudar Diretor Edukasaun Munisipal Ainaro nafatin halo koordenasaun servisu ho ita nian lideransa husi eskola sira neebe lokaliza iha Munisipiu Ainaro nian laran, tanba linha koordenasaun nee importante teb-tebes, iha asuntu importante ruma presiza fo informasaun ba malu no difikuldade saida deit mak eskola sira hasoru, nee tenke fo informasaun, tanba nee iha koordenasaun neebe diak ho ita nian diretor eskola sira,” dehan nia.
Nia akresenta, kuandu eskola sira menus fasilidade ruma ka asuntu importante ruma, sira presiza relata mai iha Edukasaun Munisipal, atu nunee bele hatoo ba iha Ministeriu Edukasaun nasional.
Entretantu Julio da Silva hanesan Diretor Servisu Edukasaun Munisipiu Liquica katak, linha koordenasaun ho Diretor Eskola sira nee diak, tanba sira sempre halo kontaktu liu husi grupu edukasaun ninia.
“Ita sempre halo kontaktu iha grupu edukasaun ninia, dala ruma mos ita liu husi enkontru sira nee ita fo informasaun importante sira, liu-liu liga ba servisu ninia, nee tenke fo hatene ba malu, ho nunee bele relata ba iha nasional,” katak nia.
(jac)
